Igsuon sa kanhi opisyal sikop sa drugas

CEBU, Philippines - Nasikop ang igsuon sa kanhi Department of Interior and Local Government Undersecretary Lito Ruiz tungod sa ilegal nga drugas ug armas.

Gironda sa mga sakop sa Provincial Intelligence Branch (PIB) ang panimalay ni Danilo Holganza Ruiz alyas Tata, 55, diha sa Ruiz Compound, Barangay Tabunok sa siyudad sa Talisay. Ang kapolisan nagdala og search warrant nga giisyu ni Judge Jerry Dicdican tungod sa armas ug drugas.

Matud ni Senior Insp. Nazareno Emia, Deputy Chief sa PIB nga nakakuha sila og impormasyon nga si Ruiz usa sa mga  nagpadagan  og ilegal nga drugas sa Talisay City Jail kauban si Frederick Go, igsuon ni Steve Go, alyas Kumander nga nagtingkagol sa Talisay City Jail.

Nakuha nila gikan ni Ruiz ang mga listahan sa mga katransaksyon niini, lakip ang drugas nga motimbang og 15 gramos nga mobalor og P270 mil, ang armas nga .9mm ug 27 ka bala sa .9mm ug 10 ka bala sa .45.

Gibutyag ni Emia, nga nakit-an usab diha sa panimalay ni Ruiz ang sakyanan sa usa ka police nga kanhi nadestino sa dakbayan sa Talisay.

“Hindi niya maitatangi ‘yung sasakyan kasi nandun pa ang order para sa kanya,” matud pa ni Emia.  Gitug-an pud ni Emia nga ang maong polis maoy kanhi escort ni Steve Go kung moadto kini sa tambalanan padung sa Talisay City Jail

Si Ruiz, miangkon nga iyaha ang armas isip pangdepensa apan gipanag-iya kini sa iyang amigo apan walay lisensya. Samtang kusganon niyang gihimakak ang nakuha nga shabu.

Sumala pa nga napugos siya og duol ni Go aron duna siyay panginabuhian tungod sa iyang kawad-on.

Gibutyag ni Ruiz, plano na unta niyang moundang tungod sa iyang mga anak, apan wala na siyay nahimo hinungdan  nangayo siya og pasaylo sa iyang pamilya ug mga igsuon.

Siya miklaro nga dugay na siyang gibadlong sa iyang igsuon apan wala siya mopatuo niini.

Si Talisay City Mayor Eduardo Gullas mimando paghimo og imbestigasyon labot sa padayun nga negosyo sa ginadiling drugas sulod sa TCJ tungod sa pagkasikop kang Ruiz.

Matud pa ni Gullas nga dali ra ang pagpadagan sa ilang ilegal nga negosyo sud sa prisuhan tungod kay aduna may cellphone nga padayon gihapon nga makasulod. (BANAT NEWS)