Insured ang mga pasahero sa Grab cars – tigpamaba

CEBU, Philippines - Gipahibalo sa Grab Philippines kagahapon nga insured ang mga pasahero sa Grab cars.

Ang tigpamaba sa Grab Philippines nga si Leo Gonzales miingon nga American company ang ilang insurance company ug ubos sa maong insurance, kun masamdan ang pasahero, makakuha kini og P20 mil ug P200 mil kun mamatay.

Dugang niya nga mao kini ang tubag nila sa kabalaka nga wala’y insurance ang ilang mga pasahero labi na kadtong Grab Cars nga wala’y provisional authority to operate gikan sa Land Transportation Franchising and Regulatory Board (LTFRB).  Si Gonzales nanghinaut nga i-renew sa LTFRB ang ilang accreditation isip Transport Network Companies nga mapupos karong Hunyo. "Of course, we are hopeful that LTFRB will renew our TNC. We invest billions of investments in the Philippines," matud ni Gonzales.

Iyang gidugang nga dili sila modili sa Grab car drivers nga mamasahero bisan og wala pa kini provisional authority gikan sa LTFRB. "Grab car drivers are not our employees. They knew the risk involved in driving a car without PA. We cannot discouraged them, it is all up to them," isplikar pa ni Gonzales.

Ang LTFRB-7 padayong nanakop sa Grab cars ug uban pang pampublikong sakyanan nga nag-operate nga wala’y PA o prangkisa. "We support the effort of the government and we respect it," matud pa ni Gonzales. Sa pagkakaron matud ni Raymond Dejan, ang Grab-Cebu city manager nga adunay 70 ka Grab cars nga nag-operate sa Sugbo nga adunay PA. (BANAT NEWS)