CIDG-7 nangita’g Tausug translator

CEBU, Philippines - Makig-alayon ang Criminal Investigation and Detection Group (CIDG) 7 sa Muslim community dinhi sa Sugbo aron hubaron ang mga text messages nga anaa sa cellphone ni Supt. Ma. Cristina Nobleza nga matud pa nakasuwat sa pinulongang Tausug.

Si Nobleza nadakpan sa police checkpoint kauban ang banang terorista nga si Reener Lou Dungon, usa ka tiguwang babaye ug 13 anyos nga bata dili layo sa Barangay Bacani sa Clarin, Bohol atol sa ikaduhang engkuwentro tali sa mga otoridad ug Abu Sayyaf.

“Kinahanglan ta mo-hire og pa-translate para i-interpret kung unsay gipangestorya didto sa na-recover nga cellphone,” si Chief Insp. Hector Amancia, deputy chief sa CIDG-7 niingon.

Sumpay pa ni Amancia nga kung mahibaw-an na kung unsa ang sud sa maong mga mensahe, dako kaayo kining tabang sa pagpalig-on sa kaso nga ipasaka batok nilang Nobleza ug Dungon. Ang cellphone ni Nobleza giingong dunay mga text message gikan ni Said Santos, anak ni Ahmad Santos nga kasamtangang napriso karon sa Bicutan tungod sa kaso sa terorismo. Si Said giingong kauban sa grupo sa Abu Sayyaf nga nisulod sa Bohol ug gusto unta nilang i-rescue.

Si Amancia niingon nga  ilaha pa usab ipaubos sa forensic investigation ang cellphone nga nasakmit gikan ni Saad Samad Kiram, ang miyembro sa Abu Sayyaf nga namatay wala pay 24 oras gikan sa pagsikop kaniya.

Sa laing bahin, gihatag na ngadto sa impormante ang P1 milyon nga reward money nga nakaingon sa pagkasikop kang Kiram didto sa Tubigon. (BANAT NEWS)