Banat ( Leaderboard Top ), pagematch: 1, sectionmatch: 1

Red tide gibantayan

CEBU, Philippines - Gitutokan karon sa Bureau of Fisheries and Aquatic Resources sa Central Visayas (BFAR-7) ang Bogo-Medellin Bay sa amihanang bahin sa Sugbo, usa sa mga kadagatan sa rehiyon nga posibleng maigo sa red tide.

Si BFAR-7 regional director Dr. Allan Poquita mitug-an sa media nga gimonitor nila karon ang maong lugar uban sa Siit Bay sa Negros Oriental ug sa Cogtong Bay ug Maribojoc Bay sa Bohol nga posibleng makitaan og red tide.

Apan giklaro niya nga sa pagkakaron luwas pang kan-on ang mga kinhason ug uban pang shellfish nga makuha sa maong mga dapit.

Kanunay usab ang ilang pagkuha og sample ug  monitoron ang kondisyon sa tubig sa maong mga dapit.

Si Poquita nipasabot nga kining red tide mogawas panahon sa ting-init kay mosaka ang temperatura sa tubig nga maoy hinungdan nga modaghan ang algae nga gitawag nilang “algal bloom.” Mao kini makapausab sa kolor sa dagat kay kini mopagawas man og daghang toxins nga motapot sa mga shellfishes nga makasakit sa tawo o hayop kun makakaon kanila.

Ang kadagatan sa Dauis ug Tagbilaran City sa Bohol nakitaan na og red tide karong mga panahona maong hugot kini karong gibantayan aron dili manguha ang mga tawo og kinhason. (BANAT NEWS)

  • Follow Us: