Sipyat ang mga bandido

Inanay na nga nagkahurot ang mga bandidong Abu Sayyaf nga misulod sa Bohol sa niaging bulan. Sa subra sa napulo ka sakop niini nga milawig sa maong lalawigan, duha na lang ang nagpabilin nga buhi ug kamulong gipangita karon sa otoridad didto.

Ang ulahi nga casualty sa habig sa Abu Sayyaf mao si Saad Samad Kiram, kinsa gipusil ug napatay sa kapolisan sa dihang mitangka kini pag-ilog og armas aron pag-eskapo usa ka adlaw human kini masikop didto sa lungsod sa Tubigon.

Si Kiram ang giingon nga maoy boatman sa mga bandido sa ilang paglawig gikan sa Mindanao padulong sa Inabanga sa Bohol kaniadtong Semana Santa nga grabe nga nakapakurat sa mga lumulupyo sa maong lungsod.

Usa si Kiram sa mga nakaipsot atol sa mga engkwentro batok sa puwersa sa kagamhanan didto sa Inabanga ug silingang lungsod sa Clarin diin daghan sa iyang mga kauban ang napatay, lakip na ang ilang kumander ug guide sa Bohol.

Ang iyang pagkasikop resulta usab sa koordinasyon sa katawhan. Kay lagi kulang sa kaon sa iyang pagtagutago sa kalungsoran sa maong probinsiya, napugos si Kiram pagpangayo og pagkaon sa kabalayan.

Apan samtang giabi-abi siya sa mga residente, tulin pa usab sila sa alas kuwatro nga mi-report ngadto sa otoridad sa iyang presensiya. Ang resulta, maayo na hinuon niya nga pagkasikop. Hangtod nga napatay gayud ang bandido sa dihang misulay kini pag-eskapo.

Kun ikumpara didto sa Basilan o Sulu, dili gayud magsilbe ang mga bandido sa ilang pagtuga-tuga og sulod dinhi sa Kabisayaan. Gawas nga wala’y baga nga kalasangan nga ilang katagoan dinhi, wala sila’y mga kaila nga andam mosagop kanila, dili sama didto sa Mindanao.

Mao nga sipyat ang plano sa mga sakop sa Abu Sayyaf nga makapanghasi didto sa Bohol. Karon duha na lang kanila ang nahibilin ug nagtagutago sa maong lalawigan, ug sa dili madugay, masakpan o mapatay ra gayud sila sa otoridad.