Asset ng militar, nilikida

LEGAZPI CITY, Albay, Philippines - Bulagta ang 17-anyos na binatilyo na inakusahang asset ng militar matapos itong pagbabarilin ng dalawang rebeldeng New People’s Army sa Purok 5, Barangay Tugas sa bayan ng Matnog, Sorsogon kamakalawa ng umaga. Napuruhan sa ulo ang biktimang si Ramel Baraguer ng nasabing barangay. Base sa ulat ng pulisya na nakarating sa Camp Simeon Ola, paalis na sana ang biktimang nakamotorsiklo nang harangin at komprontahin ng dalawang armadong lalaki. Gayunman, ilang minuto ang nakalipas ay pinagbabaril na ang biktima hanggang sa mapatay. Ayon sa ulat, inakusahan ng NPA na confidential agent ng militar ang biktima dahil nakita ito ng mga rebelde sa loob ng kampo ng Philippine Army sa bayan ng Matnog. Narekober sa crime scene ang mga basyo ng bala ng baril.