Gugma sa pinulongang Binisaya
Dili sa Pilipinas, kun dili, sa Japan nakaamgo si Atty. Leo Zaragoza sa iyang dakong gugma sa pinulongang Binisaya. Dili iyang kadugo nga mga Bisaya, kun dili, Hapones maoy nakapapugwat niya sa kamakauuwaw sa kakuwang nato og gugma sa atong kaugalingong dila.
Nahitabo ni pila ka tuig ang nilabay dihang gikuyogan ni Zaragoza ang iyang kliyente nga namalit og barko sa Japan. Tanan niyang pagtuon sa abogasiya wa kaandam niya sa pangutana sa Hapones nga nakapuyo sa Sugbo: “Nganong kamong mga Bisaya mauwaw man nga molitok ug mopalambo sa inyong pinulongan?”
* * *
Mao to ang nakaaghat ni Zaragoza sa pagtabang ug pagpakabana sa kalihokan sa pagpalambo sa pinulongang Bisaya. Nahimo siya nga pangulo sa Lubas sa Dagang Bisaya (LUDABI) sa iyang pinuy-anan nga Dakbayan sa Iligan, sa amihanang Mindanao.
Apan iyang naamgohan nga nagkahinog na ang pangedaron sa mga haligi sa LUDABI ug nagkadako ang kahigayonan nga gawas nga wa na’y mga batan-on nga makapuli nila, nag-atubang pa gyud ang atong pinulongan sa dakong hulga nga lamyon sa ubang pinulongan ug hingpit na nga makalimtan sa umaabot nga kaliwatan.
* * *
Si Zaragoza maoy abogado dili lang ni Mayor Celso Regencia sa Iligan, kun dili, apil na sa Diyosesis sa Iligan ug nahilambigit sa daghan na nga kontrobersiyal nga mga kaso sa nagkalainlaing bahin sa nasud. Apan nagtuo siya nga wa’y makahinumdom niya isip abogado.
Kumbinsido nga mas mapuslanon ang iyang matampo sa pagpreserbar sa pinulongang Binisaya, iyang gipasiugdahan ang nasudnong kombensiyon sa LUDABI karong buwana uban ang panghinaot nga marepresentahan ang mga rehiyon sa Kabisay-an ug Mindanao.
* * *
Niduaw siya sa Sugbo aron pagpahinumdom nila ni Mayor Tommy Osmeña sa Dakbayan sa Sugbo, Gobernador Junjun Davide ug ubang lokal nga mga opisyal nga kun nilihok sila sa Iligan, unta nga magpakabana sab ang mga Sugbuanon nga maoy lumad nga gibinlan sa dila ni Lapu-Lapu ug sa atong katiguwangan.
Sa nakabasa niini nga sama ni Zaragoza naaghat pagpabuhagay sa ilang gugma sa Binisaya, mangahas ko pagpahibawo nga ang kumbensiyon sa LUDABI ipahigayon karong Abril 29 ug 30 sa Dakbayan sa Iligan.
Nisaad si Zaragoza pagpahibawo sa dugang detalye sa kalihokan atol sa tulomanong “Sugbuanon Na Ni!” sa DYAB Abante Pa, Bisaya! matag Domingo.
* * *
- Latest
