Maglive-in nga pusher sikop buy-bust

CEBU, Philippines - Nag-uban sulod sa prisohan ang maglive-in partner human sila nadakpan sa buy bust operation nga gihimo sa mga sakop sa Pardo Police Station sa may Sitio Plus, Barangay Inayawan, Dakbayan sa Sugbo pasado alas 8 niadtong nakalabay nga gabii.

Ang mga dinakpan nga sila si Joel Quijano ug Ellene Dumangan kinsa giingong gikan sa A. Lopez, Brgy. Labangon apan namalhin sa Inayawan matud pa sa hepe sa Pardo Police nga si PSInsp. Robert Lucernas.

Gamit ang P200 nga buy-bust money, nakapalit og usa ka pakete sa gituohang shabu ang asset sa kapolisan hinungdan nga nasikop ang duha.

Nakuha gikan kang Quijano ang 50 gramos nga gituohang shabu nga mikantidad og P175 mil samtang nakuha sab gikan ni Dumangan ang gidudahang shabu nga mikantidad og P2, 500.

Gikonsiderar sa kapolisan nga level 2 drug pusher si Quijano nga dugay na sab nilang gipanid-an. Nasayran nga gikan sa Cebu City Jail ang ilang kontak sa ilang ilegal nga drugas.

 Samtang sa laing operasyon, nadakpan sa mga sakop sa Cebu City Drug Enforcement Unit ug City Intelligence Branch sa Cebu City Police Office si Homer Abellana kinsa tulo pa lang ka bulan nga nakagawas gikan sa prisohan.

 Natigayon ang operasyon sa Sitio Mahayahay, Brgy. Calamba pasado alas 9 niadtong nakalabay nga gabii diin nakuha sa kapolisan gikan sa dinakpan ang walo ka gramos nga gituohang shabu nga mikantidad og P94,400.

Unang nasikop si Abellana niadtong Septiyembre 2013, apan human gibarusa sa korte ang iyang kaso, nakagawas kini niadtong bulan sa Enero.

Sa Dakbayan sa Lapu-Lapu, tulo ka tawo ang nasikop sa gihimong buy-bust operation diin unang nasikop sa City Drug Enforcement Unit ug City Intelligence Branch sa Lapu-Lapu City Police Office si Melvin Cabahug Suliano sa Purok Gumamela, Brgy. Looc pasado alas 3 sa miaging hapon ug nasakmitan kini og mokabat sa 9.6 gramos nga shabu.

Matud ni PSIns. Joey Bicoy daghan sila’g nadawat nga taho bahin sa ilegal nga binuhatan sa suspetsado hinungdan nga gipahigayon nila ang operasyon.

Dihang nasikop si Suliano, girikisa kini ug nadiskubrehan ang laing dala niini nga 23 ka gagmay’ng pakete sa gidudahang shabu nga nagkantidad og P113, 280. Nakuha sab ang P200 nga marked money ug cash nga mokabat sa P600.

Laing operasyon nahitabo pagka alas 4:30 sa hapon sa may Sitio Datag, Barangay Maribago nga gipangulohan ni PCIns. Wayne Magbanua, diin ilang nasikop sila si Jovith Soliano ug Steiner Wagwag.

Nakuha gikan sa mga dinakpan ang 1.86 gramos nga gituohang shabu nga mobalor og dul-an P22 mil ug P100 nga marked money. Jojo C. Ugdol, Romeo T. Limpangog ug Rowena D. Capistrano (BANAT NEWS)