MMDA makikipagpulong sa Meralco
MANILA, Philippines - Nakatakdang makipagpulong ang Metropolitan Manila Development Authority (MMDA) sa pamunuan ng Manila Electric Company (MERALCO) para buksan ang ilang kalye na nasa kanilang hurisdiksiyon na naglalayong mapaluwag ang daloy ng trapiko sa ilang mga pangunahing lansangan sa Kalakhang Maynila tulad ng Julia Vargas St., patungong C5-Road.
Ayon kay MMDA General Manager Thomas “Tim” Orbos, inaasahan nila ang positibong tugon ng MERALCO sa kanilang panukala. Sinabi ni Orbos ang pagbubukas ng kalye kahit sa ilang pribadong kumpanya ay parte ng aksiyon ng pamahalaan upang maresolbahan ang matinding trapik sa Metro Manila.
Kamakailan ay nakipagpulong ang MMDA sa Homeowners Association ng Corinthian Garden hinggil sa kanilang hiling na buksan sa mga pribadong motorista ang ilan nilang mga kalye na pumayag naman bagaman may ilang mga inilatag na kondisyon para sa kanilang seguridad.
Magugunita na nauna nang binuksan ng MMDA ang Camp Aguinaldo, Veterans Memorial Medical Center at Bonifacio Naval Station para maging alternatibong daanan ng mga pribadong motorista na makaiwas sa trapik.
- Latest