Banat ( Leaderboard Top ), pagematch: 1, sectionmatch: 1

2 ra nakasohan og attempted kidnapping

CEBU, Philippines - Gibuhian kagahapon sa Cebu Provincial Prosecutor’s Office ang upat sa unom ka suspek sa giingong pagdagit sa upat ka tinun-an sa Lungsod sa Minglanilla sa niaging semana.

Kini human gisang-at ang kaso sa buhatan ni Fiscal Liewellyn Bonghanoy.

Apan si Kevie Paradela ug Rheamay Sagmon maoy nakit-an nga adunay probable cause sa kasong attempted kidnapping samtang sila si Estela Montes, Marian Sereño, Reymart Abobo ug Federico dela Cruz gibuhian.

Si Paradela ug Sagmon gikatakdang mopiyansa karong adlawa og tag P120 mil sumala pa sa ilang abogado, Atty. Vincent Isles.

Si Isles niinsister nga walay kidnapping nga nahitabo ug ang iyang mga kliyente igo ra namaligya og encyclopedia.

“Unsa may ilang capacity to kidnap? If they were kidnappers pagkagabii nipahawa na sila, in fact they were invited by Minglanilla Police, they were not arrested on Thursday night,” matud ni Isles.

Siya nidugang nga ila sab ipresentar ang usa ka Facebook live video gikan sa media nga magsilbing ilang ebidensiya nga inosenti ang iyang kliyente.

Usa ka inahan sa mga bata nagkanayon nga gusto lang niya nga mahatagan og hustisya ang iyang anak sanglit naapektuhan kini sa maong panghitabo.

Sa iyang bahin, ang hepe sa kapolisan sa Lungsod sa Minglanilla, Supt. Dexter Calacar, nipadayag nga ang terminong pagpangidnap ang dili angay ikomedya sa kabataan tungod kay seguro gyud nga seryusohon kini sa pagdawat sa mga bata.

 Matud ni Calacar nga sama kini sa sa airport nga dili angay ikomedya nga adunay bomba.

 Hinoon asoy ni Calacar nga nituhop gyud sa kabataan ang mga pahimangno ug pagtudlo ngadto kanila nga kung unsa ang angay nilang buhaton kun aduna’y mga tawo nga wala sila kaila ug mosuway sa pagpakig-estorya o bunlot kanila.

 Gani siya niingon nga natuldukan gyud ang mga report nga nikatap sa social media nga aduna’y puti nga van nga mangidnap og bata human sa maong hitabo.

 Samtang gisusi sab sa kapolisan sa Dakbayan sa Bogo ang gikatahong pagpangdagit sab og bata nga mga tinun-an kagahapon sa buntag apan ang duha giingong nakaeskapo.

Si Senior Police Officer 1 Alexis Camilo Villacrucis sa Bogo City Police Station niingon dili pa nila matataw kung tinuod ba nga adunay bata nga gidagit hangtud nga adunay ginikanan nga modangop sa ilang buhatan. Le Phyllis F. Antojado, Gabriel C. Bonjoc ug Romeo T. Limpangog (BANAT NEWS)

  • Follow Us: