Mister inaway ni misis, nagbigti

COTABATO CITY, Maguindanao, Philippines -  Kusang nagpasalubong kay kamatayan ang senglot na mister na sinasabing di-nakayanan ang patuloy na awayan nila ng sariling misis matapos itong magbigti sa kanilang bahay sa Purok Aguinaldo, Brgy. Kipalbig sa bayan ng Tampakan, South Cotabato, kamakalawa. Ayon sa anak na si Charmie Maaghop, senglot na umuwi ang kanyang ama na si Reynaldo Porras kaya naulit ang pakikipagtalo ng kanyang ina. Habang nagtatalo iniwan ng misis ang senglot na mister at nagtungo sa bahay ng kanyang anak na Charmie. Kinaumagahan nadatnan na lamang ng misis na nakalambitin na sa bubong ng kanilang bahay ang kanyang mister. Nabatid na bukang bibig na ng biktima na magpapakamatay sa tuwing mag-aaway mag-asawa.