Pension sa indigent seniors pausbawan

CEBU, Philippines - Giduso ni Senadora Grace Poe ang pag-usbaw sa social pension sa mga indigent senior citizens.

Ang Senate Resolution No. 280 nga gipasaka ni Poe nagmando sa hingtungdan nga komitiba sa Senado sa pagtan-aw sa posibilidad sa pag-umento sa social pension for indigent senior citizens, nga kasamtangan na nilang nadawat ubos sa Republic Act No. 9994 o ang Expanded Senior Citizens Act of 2010.

“Nararapat at napapanahon nang rebyuhin ang batas na naipasa pa noong 2010 dahil nakasaad dito na kada dalawang taon ang isinasagawang pagbusisi ng Kongreso. Sa tumataas na presyo ng mga pangangailangan ng ating senior citizens, nananawagan tayo ng umento sa kanilang social pension buwan-buwan dahil hindi na sapat ang P500 na kanilang natatanggap,” matud ni Poe sa iyang press statement nga gipadala sa Banat News.

Sa pagkakaron adunay 2.8 million nga indigent senior citizens sa nasud nga hayan makadawat na unya og social pensions ubos sa 2017 national budget.

Ubos sa maong balaud, ang indigent senior citizens nga nagpangedaron og 60-anyos pataas makadawat kini og P500 matag buwan isip dugang sa ilang adlaw-adlaw nga panginahanglan ug medical nga panginahanglan.

Nanghinaut si Poe nga kahatagan og seryusong pagtagad ang iyang gipasaka nga balaudnon ilabi na nga sobra na sa lima ka tuig ang nilabay sa mandatory congressional review ubos sa nalatid sa R.A. 9994. - /GMR) (BANAT NEWS)