Daghan pang mamatay

CEBU, Philippines - Presidente Rodrigo Duterte mibahad nga daghan pa ang mangamatay nga nalambigit sa ilegal nga drugas tungod kay dili siya mohunong hangtud nga dili sila mahurot kay giisip niyang sila maoy dakong hulga sa mosunod nga mga henerasyon sa kabataang Pilipino.

Matud pa ni Duterte, 40 porsiyento sa mga kapitan sa tibuok Pilipinas ug 6 mil ka mga polis ang nalambigit sa ilegal nga drugas ug misaad siyang dili siya mohunong pagpangita kanila.

Kagahapon gipakita ni Duterte ang usa ka dakong itom nga folder nga adunay listahan sa mga opisyales sa gobiyerno nga nalambigit sa makinarya sa sindikato sa ilegal nga drugas.

Wa usab kalikayi ni Duterte nga  atakihon ang simbahan nga gihulagway niyang walay gihimo aron tabangan ang mga kabus.

Gihagit niya ang Simbahan nga mohimo og lakang pinaagi sa pagkombinsir sa mga nalambigit sa ilegal nga drugas sa ilang lugar nga mohunong na.

Sumala pa ni Duterte, mas maayo usab mohimo og mga rehab center ang simbahan tungod kay aduna silay daghang kwarta.

Matud pang Duterte dili siya mahingawa bisan daghan ang mamatay basta dili lang maguba ang kaugmaon sa nasud.

Si Gob. Hilario Davide sa Probinsya sa Sugbo una nang mipadayag nalipay kini nga ibalik na ang kapolisan sa kampanya kontra ilegal nga drugas.

Giklaro hinuon niya nga salig siya sa katakos sa Philippine Drug Enforcement Agency apan kuwang gyud kini og mga sakop ug ang kapolisan dako na kaayo og ikatabang kanila.

Si Police Regional Office-7, Chief Supt. Noli Taliño sa iyang bahin miangkon nga dili siya makapasalig nga wala na usab mangamatay sa pagbalik nila sa operasyon batok sa ilegal nga drugas.

“Hindi natin maiwasan na hindi madugo  kasi itong mga drug pushers mga high value target ..hindi basta basta maiwanan. Iyung iba dito talagang lalaban para lang maprotektahan yung mga illegal business mapipilitan ang polis,” matud pa ni Taliño.

Ang Simbahan nanawagan atol sa “Ash Wednesday” nga likayan ang pagpatay ug paglapas sa tawhanong katungod

 “Ayaw din natin na malagasan nang polis, may pamilya din sila may trabaho na ginagampanan,” tubag pa sa director sa PRO-7.

Iyang giklaro nga magpabilin ang estriktong pagsunod sa mga lagda sa tawhanong katungod sa mga suspek.

Gipahibalo ni Taliño nga dili na gamiton ang Oplan Tokhang-Double Barrel apan siya mipasalig nga mas agresibo kini karon.

Subli na sab karon nga gi-ukay sa kapulisan ang mga listahan nila sa mga naglihok og drugas sa palibot aron maoy rumbohon karon sa pagatukorong Drug Enforcement Units.

Si Cebu City Vice Mayor Edgardo Labella nanghinaot dili moabuso ang mga polis paghimo sa operasyon, kadtong malinawong motahan kinahanglang hatagan og kahigayonan.

Samtang si Konsehal Dave Tumulak, Deputy Mayor for Police Matters uyon sa pagbalik sa kapolisan sa operasyon batok sa ilegal nga drugas apan sama ni Labella mipasidaan kini sa mga polis nga di gyud moabusar.

Matud pang Tumulak nakadawat siya og mga report  gikan mismo sa mga inosenteng tawo nga gibinuangan sa mga polis. Iyaha nang gihangyo ang mga nireklamo pagduso sa mga pangalan sa maong mga polis.

Si Taliño miklaro nga pulos tarong, limpyo, way derogatory records ang mga polis nga mamahimong miyembro sa DEU apan sila kinahanglang may koordinasyon sa buhatan sa PDEA.

Ang mga direktor sa kapulisan sa Cebu City Police Office, Sr. Supt. Joel Doria ug sa Cebu Provincial Police Office, Sr. Supt. Eric Noble mipadayag nga andam na sila sa pagbalik sa kampanya batok ilegal nga drugas. Rowena Capistrano, Jojo Ugdol ug Decemay Padilla (BANAT NEWS)