UP sososyo uli sa itaas
MANILA, Philippines - Matapos madungisan ang rekord, gigil na makabawi ang University of the Philippines sa pakikipagtipan sa Far Eastern University sa pagpapatuloy ng UAAP Season 79 women’s volleyball tournament sa The Arena sa San Juan City.
Magkukrus ang landas ng Lady Maroons at Lady Tamaraws sa alas-2 ng hapon kasunod ang duwelo ng National University at University of Santo Tomas sa alas-4.
Lumasap ng unang kabiguan ang UP nang yumuko ito sa Ateneo, 14-25, 19-25, 21-25 noong Linggo upang mahulog sa ikatlong puwesto tangan ang 4-1 baraha.
Napunta ang liderato sa Ateneo at reigning champion La Salle na may parehong 5-1 baraha.
Kaya naman inaasahang ibubuhos ng Lady Maroons ang kanilang ngitngit sa Lady Tamaraws sa oras na magharap ang dalawang paboritong koponan.
Papalo para sa UP sina sophomore Diana Carlos at Isa Molde na parehong gumawa ng 12 puntos sa kanilang huling laro subalit kinakailangan nina Katherine Bersola, Marian Buitre at Nicole Tiamzon na magbigay ng malaking kontribusyon.
Nalimitahan lamang sa pinagsama-samang 10 puntos sina Bersola, Buitre at Tiamzon kasama pa ang 22 errors na nagawa ng Lady Maroons.
Haharap ang UP sa matikas na FEU na galing sa dalawang sunod na panalo kabilang ang 25-20, 25-13, 22-25, 25-20 pananaig laban sa NU.
- Latest