EDITORYAL - Hayan magkihaay

May katungod ang Filinvest Land Incorporated nga ipakanselar nila ang kontrata nga gipirmahan sa ilang mga opisyal ug sa kagamhanan sa dakbayan kun tinuod man nga ang City Hall wala makatuman sa mga gilatid sa kasabotan.

Dili malalis nga anaa sa balaod nga kun adunay usa ka “party” sa mga nagpirmahay og kasabotan nga dili makatuman sa gilatid nga lagda, magamit kini nga rason sa pagpa-rescind kon pag-revoke sa kontrata.

Apan kinahanglan usab nga ang Filinvest motuman sa mga gilatid sa balaod, dili kay diretso ra sila nga mopakanselar sa kontrata sa pagpalit nila og 19.2 ektarya nga kayutaan diha sa South Road Properties. Kinahanglan unta nga ang mga opisyal sa Filinvest mopadala og suwat ngadto sa City Hall aron pahibaw-on ang mayor nga wala kini matuman sa mga lagda sa pagbaligya sa kayutaan.        

Kun nakapadala na og demand letter ang Filinvest unya magpabilin gihapon nga dili motuman ang City Hall sa iyang obligasyon, diha na nga bahina nga mahimong ma-default ang City Hall ug basehanan kini sa pag-atras sa kontrata.

Sigurado gyud nga kining lakang sa Filinvest nga pag-atras nila sa gisudlang kontrata tali sa dakbayan, supakon gayud sa kadaghanang konsehal, ilabi na ang mga sakop sa Team Rama.  Daghan ang gipanguyawan nga kun ang mga abogado sa dakbayan dili manalipod sa katungod sa dakbayan sa Sugbo nga nakadawat na sa pasiunang bayad sa halin sa yuta, hayan nga adunay mopasaka kanila og kaso.

Gituohan nga ang City Legal Office mohimo gyud og mga paagi aron ipahaom sa argumento ni Mayor Tomas Osmeña nga mihulagway nga barato ra ang kantidad sa pagbaligya sa 45 ektarya nga kayutaan sa SRP nga miabot lang og P16.7 Bilyones.

Nindot nga tugotan sa City Council si Osmeña nga mobaligya og tulo ka ektareya nga yuta diha sa SRP aron masuta kun makahalin ba siya og P110 mil matag metro kwadrado aron pagmatuod nga barato gyud ang pagbaligya kaniadto sa kanhi administrasyon.