Gipatay tungod sa panaglalis

CEBU, Philippines - Duha ka tawo ang gipatay, ang usa gipusil samtang nagduwa og bingo didto sa Barangay Lorega-San Miguel, samtang ang laing biktima gidunggab sa tawo nga iyang gikalalis kay gikulata ang iyang asawa didto sa Barangay Ermita.

Ang gipusil didto sa Barangay Lorega-San Miguel mao si Oswaldo Canonigo, 46, nagpuyo sa Sitio San Miguel sa mao nga barangay, samtang ang gidunggab didto sa Barangay Ermita mao si Bjorn Borg Fajardo, 35, minyo, taga Barangay Suba.

Sa imbestigasyon sa mga sakop sa homicide section sa Cebu City Police Office nga gipangulohan ni SPO2 Wetzel Berry nasayran nga samtang nalingaw pagdula og bingo machines si Canonigo sulod sa balay sa ilang silingan, kalit lang niabot ang usa ka lalaki ug dayon pusil sa biktima.

Gikan sa likud sa iyang ulo, ang bala milapos sa iyang mata.          Human sa pagpamusil dali nga misibat ang gunman. Nasayran sa mga imbestigador nga posibleng personal nga kasuko ang hinungdan nga gipatay ang biktima.

Matud pa nga pipila ka adlaw ang nakalabay, si Canonigo may nakalalis ug nga gikatahong nagbinaharay pa sila nga dunay mahitabo nga dautan sa sunod nila nga panagtagbo. Nagtuo ang kapolisan nga mao kini ang posibleng motibo nga gipatay ang biktima. Sa crime scene, napalgan sa mga polis ang usa ka basiyo sa 45 kalibre nga pistola.

Samtang, ang laing biktima nga si Fajardo nakiglalis sa lalaki nga nikulata sa iyang asawa apan gidunggab hinoon siya didto sa Ermita Proper, Barangay Ermita. Ang giingong midunggab ni Fajardo mao si Junjun Pacaldo, 19, ulitawo, ug nagpuyo ra gihapon sa Barangay Ermita.

Matud ni PO3 Raidale Sardual, desk officer sa Carbon Police Station, nga gikomprontase sa biktima ang suspetsado kay gidapatan ang iyang asawa, apan misangpot na hinoon sa panaglalis.

Sumala ni PO3 Sardual nga nagdaling niuli sa ilang balay si Pacaldo ug nagkuha og 11 ka pulgadas nga kutsilyo ug mibalik, dayong dunggab sa biktima. Misuway kini pagsibat apan nadakpan sa mga paryente sa iyang gipatay.

Gisuwayan unta pagdala sa ospital si Fajardo apan wala magdugay, namatay.

Ang suspek nga si Pacaldo anaa na karon gibilanggo sa Carbon Police Station. Rowena D. Capistrano ug Jojo C. Ugdol (FREEMAN)