Dumpit mao nay caretaker sa Ermita

CEBU, Philippines - Nakadesisyon si Cebu City Mayor Tomas Osmeña nga  ibutang si Senior Police Officer 1 isip caretaker sa Brgy.Ermita human sa pagkasuspenso sa tanan nilang mga barangay officials sulod sa unom ka buwan.

Giklaro ni Mayor Osmeña dili sayon ang gihimo niya nga desisyon tungod kay si Konsehal Dave Tumulak, Deputy Mayor for Police Matters kinsa nakigkita sa mga kawani sa barangay ug residente sa Ermita niadtong adlaw’ng Biyernes maayo man usab motrabaho.

Apan kun problema sa ilegal nga drugas ang hisgutan sigon sa mayor mas gikahadlukan sa mga durugista si Dumpit inay ni Tumulak.

Sigon sa mayor tsansa na kini sa siyudad aron limpyuhan ang barangay gikan sa problema sa ilegal nga drugas.

Hinuon, giklaro ni Osmeña anaa lang gihapon si Tumulak lakip na si Atty. Winifredo Ordcullo aron pagsuporta kang Dumpit.

Gitug-an  ni Osmeña nga nahinabi na niya si Dumpit ug gipangutana niya kini kun modawat ba kini sa maong responsibilidad ug matod si Dumpit miingon nga andam siya. Ang nag-unang kamandoan nga gihatag ni Osmeña kang Dumpit mao ang paghipos sa tanang mga badlungon sa maong barangay.

Magsugod si Dumpit sa iyang katungdanan karong adlaw’ng Lunes hinungdan nga siya maoy makita sa mga kawani ug residente sa maong barangay nga mo-supervise sa lugar.

Hinoon, gihimug-atan ni Osmeña nga kun pananglitan nga aduna nay itudlo ang Malacañang nga mao gyud ang mahimong OIC-Barangay Captain wala ra kini problema.

Alang usab sa mga dokumento nga kinahanglang pirmahan sama sa mga clearances ug sweldo sa mga kawani matud pa niya ang city administrator mahimong makapirma niini ug mahimo usab si Vice Mayor Edgar Labella kun wala ang mayor sa Sugbo.

Samtang gipahibawo ni Osmeña ang rason nganong mopasaka kini og kaso batok kang Presidential Assistant for the Visayas Michael Dino tungod kay buot niya mahibawo ang katawhan nga si Dino usa ka ‘influence peddler.’

Si Osmeña mipadayag usab nga andam siya kun kasohan usab siya ni Dino kinsa daan nang mibahad nga mopasaka og kaso kun dili siya undangan ni Osmeña pagdaot.

Daan nang mipasabot si Dino nga dili siya manghilabot sa isyu kun kinsa ang ibutang nga caretaker sa Ermita tungod kay trabaho kini sa DILG. (BANAT NEWS)