Tumulak: Way pamolitika ang pag-adto sa Ermita
CEBU, Philippines - Human mipadayag sa iyang intensiyon nga andam siya mo-supervise sa Barangay Ermita, personal nga giadto kagahapon ni Konsehal Dave Tumulak, Deputy Mayor for Police Matters ang naasoy’ng barangay ug nakigtagbo kini sa mga kawani ug residente sa lugar. Giklaro ni Tumulak, ang tumong sa iyang pagpakigtagbo sa mga kawani ug residente mao ang pagpaminaw sa ilang mga yangungo ug kabalaka ug aron usab mapahinumduman ang mga kawani sa barangay mahitungod sa ilang responsibilidad. Kini bisan pa man og wala sila’y mga barangay officials tungod sa pagsuspenso kanila og unom ka buwan.
Matud ni Tumulak, kun adunay mga problema ang mga barangay ug kun dunay mga gikinahanglan mahimo ra nga siya maoy mo-request niini sa siyudad aron dili maapektuhan ang ilang mga basic services.
Giklaro sa konsehal nga dili pamulitika ang iyang gibuhat kay boluntaryo lang kini tungod kay dili buot ni Tumulak nga mag-antos ang mga residente sa Ermita.
Laing pagklaro ni Tumulak nga dili siya mopirma og dokumento ug motudlo o motaktak og kawani sa barangay kay dili siya otorisado.
Usa sa mipadayag sa ilang kabalaka mao si Eugene Cabigon, garbage collector sa barangay kay naguol gyud sila nga wala sila’y dawaton nga sweldo.
Nasayran nga ang sweldo nga ilang madawat gikan sa siyudad anaa sa P5,000 ug laing P2,500 isip honorarium sa barangay.
Si Tumulak mipasalig nga dili pasagdan sa siyudad ang barangay sa krisis nga ilang nasinati karon. (BANAT NEWS)
- Latest
