Binanggaay didto sa Tuburan duha patay, tulo angol

CEBU, Philippines - Duha ka tawo, apil ang bata nga babaye, nangamatay ug laing tulo ang grabeng naangol sa panagbangga sa Ceres Bus ug sa usa ka Mitsubishi van didto sa national highway sa Sitio Matnog, Barangay Putat, Tuburan kaniadtong Martes sa hapon.

Si PO2 Jameller Palanas sa Tuburan Police Station miila sa namatay nga mao si Napoleon Mahinay, 43-anyos ug maoy drayber sa van type nga sakyanan. Namatay usab ang tres-anyos nga pag-umangkon ni Mahinay.

Ang mga naangol naglakip sa inahan sa bata nga si Victoria Senining, ug duha ka kabanay sa drayber nga sila si Margie Mahinay ug Fransisca Mahinay, pulos mga hingkod ug taga Tabuelan.

Matud pa ni PO3 Palanas nga ang Ceres Bus (CEO 8888) nga gimaneho ni Ruben Ompad, 30-anyos, taga Barangay Basak, Dakbayan sa Lapu-Lapu, nagdagan paingon sa Poblacion, Tuburan samtang gikan usab sa lungsod ang van paingon na sa Tabuelan.

Pag-abot nila sa Barangay Putat, kalit lang nagkadinam-agay ang duha ka sakyanan ug ang van maoy nagrabehan, ug matud pa napiit pa gani ang drayber sa iyang gilingkoran.

Ang drayber ug ang bata gidala pa gani unta sa ospital apan tungod sa grabeng mga samad gideklarar kini sa mga doktor nga patay na. Ang laing tulo ka angol gibalhin gikan sa Tuburan District Hospital paingon sa tambalanan dinhi sa dakbayan.

Si PO3 Palanas mitug-an nga ang drayber sa Ceres Bus nga si Ompad mitahan hinuon dayon sa kapolisan ug gitanggong kini karon sa ilang detention cell ug giandaman na og kaso nga reckless imprudence resulting to double homicide ug sa pagkaangol sa laing mga biktima. (BANAT NEWS)