Budget aprobahan apan uban tag P1 na lang

CEBU, Philippines - Aprobahan na sa konseho sa Siyudad sa Sugbo ang giduso nga 2017 budget sunod semana.

Matud ni Konsehal Jocelyn Pesquera, kinsa pangulo sa committee on budget and finance sa konseho, nga nagkasabot na ang minority ug majority nga aprobahan ang P7.2 bilyones nga giduso ni Mayor Tomas Osmeña.

Giklaro ni Pesquera nga aprobahan ang maong kantidad apan dunay mga items sa budget nga dili mabutangan og allocation ug ang ubang items ang minusan base sa prayoridad sa konseho.

Matud niya nga mahimo na lang tag P1 ang P2.7 milyones alang sa job order sa PROBE team; P39 milyones sa scholarship program sa niaging mga tuig; P33 milyones alang sa lot acquisition structure sa Iglesia ni Cristo property; P22.6 milyones sa pagkaon sa City Jail; P15 milyones sa pagbutang og command control center sa 9th floor sa City Hall ug ang P15 milyones sa pagpakoral sa Osmeña Shrine.

Matud ni Pesquera nga aprobahan nila ang P30 milyones alang sa Roque Ting property.

Sigun niya nga dili na mahimong usbon sa konseho ang P85 milyones nga aprobahan nga budget gikan sa P600 milyones alang sa pag-rehabilitate sa landfill sa Inayawan tungod wala kini mapasabot og tarung kunsa unsaon paggasto ang maong kantidad.

Giklaro ni Konsehal Raymond Alvin Garcia nga mosuporta ang konseho sa long life program sa mayor nga maghatag og libreng tambal sa mga residente sa siyudad.

Apan  matud ni Garcia nga dili na angay mo-hire og mga volunteers kay dunay barangay health workers nga gibansay na daan nga pwedeng mobuhat sa trabaho.

Si Osmeña sa iyang bahin niingon nga tun-an una niya ang aprobahan nga budget sa konseho. (BANAT NEWS)