Usa patay, usa angol sa managlahi nga pagpamusil
CEBU, Philippines - Usa patay samtang usa ang angol sa nagkalain-laing pagpamusil sa Dakbayan sa Sugbo niadtong Biyernes sa gabii ug kagahapon sa kaadlawon.
Si Janino Rayton, 24, walay klarong pinuy-anan, ang gipusil patay sa duha ka wala mailhing tawo nga nagsakay og motorsiklo alas 10:30 sa gabii sa Pedro Calomarde Street, Kamputhaw, Cebu City.
Base sa imbestigasyon sa kapolisan nga samtang naglakaw ang biktima sa karsada kalit lang siya nga gipusil sa wala mailhing tawo ug naigo sa tuong dughan ug bukton.
Ang biktima gidali unta pagdala sa tambalanan apan gideklarar nga dead-on-arrival.
Ang kapolisan nakarekober og duha ka kabhang sa bala sa caliber .45 sa crime scene.
Samtang usa ka 17-anyos nga lalaki ang kalit nga gipusil sa wala mailhing tawo samtang nagbarug sa may Mindanao Avenue eskina Cardinal Rosales Street sa Cebu Business Park kagahapon sa kadlawon.
Ang biktima naila nga si Lyndon Dondoyano, taga Sitio Mabuhay, Barrio Luz, kinsa nakaangkon og samad pinusilan sa tuong tuhod.
Ang biktima nakadagan ug gidala sa tambalanan samtang ang namusil ang dali sab nibiya sa lugar. (BANAT NEWS)
- Latest
