Talisay magtukod og water district

CEBU, Philippines - Nagtinguha karon ang kagamhanan sa Dakbayan sa Talisay nga magtukod og kaugalingong water district.

Si Mayor Eduardo Gullas niingon nga iyang nahuna-hunaan nga mohimo sila og kaugalingong water district aron moserbisyo sa mga Talisaynon.

Niadtong miaging semana, si Gullas nipadala og suwat ngadto ni City Legal Officer Giovanni Sususco aron himuon ang organisasyon sa iyang tinguha.

Matud pa ni Gullas nga kinahanglan nga sila mohimo og Talisay Water District tungod kay sa ila mang siyudad nagkuha og tubig ang Metropolitan Water District (MCWD) nga gi-supply sa mga franchise niini.

Apan nasagmuyo ang mga taga Talisay kay sila na man hinuon nga tinubdan sa tubig maoy nahikawan sa supply niini gikan sa MCWD.

Asoy pa ni Gullas nga adunay 26 ka mga deep wells ang MCWD nga gibutang sa siyudad.

Si Gullas niingon nga ila unang obserbahan ang Memorandum of Agreement (MOA) tali sa siyudad ug sa MCWD kun wala ba unya sila’y malapas sa gikasabutan kun ugaling ipa-implimentar na niya ang iyang plano.

Gipatun-an ni Gullas ang dugay na nga MOA sa siyudad ug MCWD ug didto ilang nakita nga naalkansi gyud ang dakbayan.

Gikaingon nga modawat lang og P300 mil kapin ug kulang ang siyudad gikan sa MCWD matag kwarter nga wala gani igong basehan sa maong kwarta.

Gusto sa administrasyong Gullas nga aduna gyu’y representante ang dakbayan diha sa MCWD board. (BANAT NEWS)