Konsehal gipusil patay

CEBU, Philippines - Patay ang usa ka konsehal sa barangay San Jose sa Lungsod sa Catmon human kini gipusil sa wala mailhing tawo nga nagsakay og motorsiklo diha sa highway sa maong barangay niadtong Biyernes sa gabii.

Ang namatay mao si San Jose Barangay Kagawad Jeffrey Comeros, 40, kinsa nakaangkon og mga samad pinusilan sa nagkadaiyang bahin sa iyang lawas nga nakaingon sa iyang kamatayon.

Matud ni Senior Police Officer 2 Crisente Armamento nga samtang nag-ayo ang biktima sa usa ka sakyanan atubangan sa iyang shop daplin sa kalsada kalit nga adunay naabot nga duha ka lalaki nga nag-motor.

Ang angkas niini matud pa way panabi nga daling mipusil sa biktima sa makadaghang higayon  nga nakaingon sa kamatayon sa kagawad sa barangay.

Matud ni Armamento, desk officer sa Catmon Police Station nga nagsuot og ski mask ang mga mamumuno  ug dali  kaayong mibiya sa lugar human sa pagpamusil.  Si Comeros gidala sa Juan Dosado Memorial Hospital sa Sogod apan gideklarar kini sa mga doctor nga patay na pag-abot didto.

Ang kapolisan mipalawom pa karon sa ilang imbestigasyon aron pagsuta sa motibo ug aron maila ang mga responsable sa pagpatay sa biktima. (BANAT NEWS)