Duha ka bata namatay sa dengue

CEBU, Philippines - Duha ka batang lalaki ang nangamatay kagahapon sa kaadlawon diha sa Cebu City Medical Center tungod sa sakit nga dengue kay giingong ang duha gidala kanila nga anaa na sa “severe condition” matud pa ni CCMC hospital administrator Kenneth Siasar.

Matud niya ang unang namatay mao ang 3- anyos nga nagpuyo sa Brgy. Basak San Nicolas ug sunod ang 10- anyos nga taga Brgy. Basak Pardo.

Ang 3- anyos nasulod sa CCMC niadtong Disyembre 7 sa gabii ug namatay kagahapon sa ala 1:31 sa buntag.  Samtang ang 10 anyos gi-admit niadtong Disyembre 8 sa gabii ug namatay usab kagahapon sa alas 3:40 sa buntag.

Si Siasar nagkanayon nga ang duha namatay tungod sa “severe dengue” kay uwahi na kaayo kining gidala diha sa tambalanan ug naglisod na ang kondisyon.

Si Siasar mipasabot nga ang early symptoms sa dengue fever mahimong dili mabantayan dayon sa mga ginikanan kay ang mga bata makaduwaduwa pa gani.

Matud pa ni Siasar, kasagaran lima ngadto sa unom ka adlaw na ang hilanat sa bata ayha pa dad-on sa tambalanan.

Sumala pa ni Siasar uwahi na kaayo kini aron masalbar pa ang bata sa mga doktor tungod kay ubos na kaayo sila nianang mga panahona og immune system tungod kay dili na kini hingaon ug wala nakatumar sa saktong tambal.

Si Siasar subling miawhag sa mga ginikanan nga dili mokompiyansa ug batasanon gyud ang pagkonsulta dayon sa mga doctor kun maghilanat ang ilang mga anak subay sa mando sa Department of Health-7.

Ang DOH-7 Regional Epidemiology and Surveillance Unit  nakatala na karong tuiga og 214 nga namatay sa dengue sa tibuok rehiyon-7 sukad niadtong Enero 1 hangtod sa December 3; mas daghan kini kun itandi sa 77 nga namatay sa maong sakit sa miaging tuig sa samang period.

Si Dr. Alma Corpin, officer-in-charge sa Cebu City Health Department, midason nga kasagaran sa mga natakboyan og dengue mao kadtong nag-edad ubos sa 10 anyos kay sila sayon lang maduol sa lamok. (BANAT NEWS)