Inspeksiyon sa karnehan sa Mandaue gihugtan

CEBU, Philippines - Gipatawag sa City Veterinary Office ang tanang namaligya og karne sa merkado publiko ug mga satellite market sa kabarangayan sa Dakbayan sa Mandaue.

Tumong niini nga sila mapahibawo sa hugot nga pagpatuman sa siyudad sa mga ordinansa ug sa executive orders nga giluwatan ni Mayor Gabriel Luis “Luigi” Quisumbing.

Usa niini nga kinahanglan una nga mokuha og veterinary clearance ang manindahay og karne sa dili pa isyuhan og sanitary permit sa City Health Office.

Lakip sa gituki ang “New Market Code of the City of Mandaue” diin hugot na ang inspeksiyon sa mga inihaw nga mga baboy, manok, baka, kanding ug uban pa ug ang hugot nga pag-monitor sa gibaligya niining karne sa kamerkaduhan.

Giawhag usab ang mga meat handler/cutter, mangingihaw, meat vendors ug meat dealers ug operators nga mokuhag accreditation o lisensya nga aprobado sa City Veterinary Officer ug kinahanglan nga dunay ID cards nga pinirmahan sa mayor. Gipasabot ni Dr. Nestor Taasan, ang city veterinarian, nga gituyo nila ang maong tigum aron pagseguro nga luwas ang tanang karne nga ibaligya sa kamerkaduhan labi na karon nga Christmas season. (BANAT NEWS)