Pagkarelibo maoy pinaskuhan

CEBU, Philippines - Gipahibawo sa director sa Police Regional Office-7, Chief Supt. Noli Taliño, nga dunay relibuhan nga mga opisyal sa kapolisan sa dili pa ang Pasko gumikan sa hinay nga kampanya batok sa ilegal nga drugas.

Una na nga nimando si Taliño sa mga city ug provincial directors nga makahimo sila sa pagrelibo sa ilang mga hepe kung makita nga kuwang ang lihok niini sa trabaho.

“Kadudaduda ba ang performance? Kasama sa evaluation yun, di natin alam tamad lang, tinatamad o walang motivation magtrabaho or pwedeng may pinuprotektahan yan,” matud ni Taliño.

Lakip sa subayon sa validation ang posibleng wala nay mga drug personalities sa usa ka dapit hinungdan nga wala nay nahimo nga trabaho batok drugas ang kapolisan.

Kagahapon ang PRO-7 nihimo og re-evaluation sa tanang chiefs of police sa Central Visayas sa ilang kampanya batok drugas ug mahibaw-an kung pila ka mga COPs ang posibleng marelibuhan.

Samtang duha ka lalaki nga nalambigit sa ilegal nga drugas ang nasikop sa buy-bust operation sa Sitio Litmon, Dumlog, Dakbayan sa Talisay niadtong Martes sa gabii.

Ang mga dinakpan mao sila si Elvin Serra, 29, ulitawo, ug si Renato Reyes, 36, minyo, ug nakuhaan og 10 ka gagmay nga pakete sa shabu ug usa ka .38 revolver nga walay bala.

Nitimbang og .51 gramos ang mga ebidensya nga nakuha nga mokantidad og P6 mil.

Nasakmit sab sa kapolisan ang 9.8 gramos nga shabu nga nagkantidad og P105,200 gikan sa pusher nga nitahan na sa Oplan Tukhang apan nadakpan sa buy-bust operation sa Sitio Calubihan, Yati, Lungsod sa Liloan alas 9 pasado sa niaging gabii.

Si Senior Police Officer 4 Wilfredo Catursa sa Liloan Police Station niila sa nadakpan nga si Francis Anton Lungaki Tuong, 58, nagpuyo sa maong lugar.

Dugang nakuha gikan sa dinakpan ang duha ka Samsung nga cellphone ug salapi nga P500 nga gituohang halin sa pagpamaligya og shabu. (BANAT NEWS)