Sunog napawong sa mga silingan
CEBU, Philippines - Naukay ang mga molupyo sa dalan M.L. Quezon sa Maguikay, Dakbayan sa Mandaue tungod sa kalit nga pag-ulbo sa kayo sa usa ka panimalay alas 11:59 sa buntag sa niaging adlaw.
Nagtinabangay ang mga silingan sa pagpawong gamit ang mga balde sa tubig hinungdan nga napugngan gyud ang pagkatap sa kayo hangtud nga nahidangat ang mga bombero.
Si Senior Fire Officer 1 Edgar Vergara nibutyag nga ang kayo nagsugod sa kisame sa panimaye ni Aura Reyes ug posible nga may faulty electrical wiring nga niresulta sa short circuit.
Si Reyes ug mga sakop sa pamilya wala atol sa hitabo maong ang mga silingan ang dali nga nakatabang ug nakapanawag sa bombero.
Matud ni Vergara ang nag-una gyud nga hinungdan sa sunog panahon sa Pasko mao ang short circuit ilabi na kung magpatuyang og gamit sa kuryente sama sa pagpasiga sa mga series lights ug pagbutang og mga extension alang sa Christmas tree ug daghan pa. (BANAT NEWS)
- Latest
