‘Hitman’ sa Akrho gipusil, kritikal

CEBU, Philippines - Kritikal ang kahimtang sa giingong hitman sa Alpha Kappa Rho (Akrho) Fraternity human gipusil sa duha ka lalaking nagmotorsiklo sa Sangi, Tabunok, Dakbayan sa Talisay kagahapon sa alas 3:30 sa kaadlawon.

Ang biktima mao si Wilbert Cabajar, 38-anyos, ulitawo nga taga Bahadas, Tabunok.

Napagan ang usa ka lalaki nga si Teofanis Sarsi, 34, ulitawo nga taga Pardo, Siyudad sa Sugbo nga natulog sa lamesa.

Si PO3 Jason Del Campo sa Talisay City Police Station niingon nga nagduwa og hantak si Cabajar niadtong higayuna dihang niabot ang namusil nga nagsakay og motorsiklo.

Ang backrider nanaug ug nagpasalba sa iyang armas hinungdan nga nagdinaganay ang mga nagduwa og hantak lakip na si Cabajar apan siya maoy gigukod sa armadong tawo dayon gipusil makadaghang higayon.

Naigo sa iyang buko-buko si Cabajar hangtud nga kini nahagba samtang si Sarsi nga nakadungog sa sipang buto nibangon ug apil sa pagdagan.

Asoy ni Del Campo nga delikado ang kahimtang sa biktima tungod kay grabe ang iyang nahiagumang samad pinusilan.

Matud ni Del Campo nga hitman si Cabajar sa Akhrosa dugay na nga katuigan ug gani bag-o lang kini nga nakagawas gikan sa prisohan sa Muntinlupa.

Siya nagkanayon nga gawas pa sa background sa biktima ila sab subayon ang ubang mga anggulo kung unsa gyud ang motibo sa pagpamusil. (BANAT NEWS)