Nangilkil gamit ang Facebook nasikop
CEBU, Philippines - Duha ka babaye ang giaresto sa mga sakop sa National Bureau of Investigation-7 diha sa usa ka mall human sa duha ka semana nga surveillance tungod sa reklamo nga sila nangilkil gamit ang Facebook.
Ang duha mao sila si Aldara Piñero ug Sistine Piñero pulos taga Brgy. Labangon ning Dakbayan sa Sugbo human sila gireklamo sa usa ka food processing company pinaagi sa Facebook.
Matud pa ni Henry Dy, General Operations Manager sa Sunpride Foods Inc., nga ang duha nag-post sa Facebook gamit ang account ni Aldara nga Aldara Dacoron Mirafuentes niadtong Nobiyembre 16 karong tuiga. Sa video gipakita nga ang usa ka corned beef nga produkto sa Sunpride adunay ulod ug kini nakaani og 735, 000 ka views.
Siya nagkanayon nga ang tanang canned meat products moagi og proseso nga sterilization aron masiguro nga walay microorganisms o ulod nga masulod sa lata.
“So its impossible when you open a can and pour it sa plato o sa kaha nga there will be worm crawling out of it, it’s simply not biologically or physically possible,” matud ni Dy.
Si Dy miingon nga gipangayoan sila sa duha og P735 mil base kuno sa gidaghanon sa mga “views” sa ilang posts. Matud ni Dy gi-blackmail sila nga kun di sila mohatag di gyud nila papason ang video.
Apan si Aldara nihimakak sa pasangil ni Dy ug miingon nga “sila man ang mi-offer sa amoa kun unsay kuan. Then murag nikagat na lang pud mi ba.” Ang duha pasakaan og kaso nga grave threats ug kalapasan sa Republic Act 10175 o ang Cyber Crime Law didto sa Cebu City Prosecutors Office. (BANAT NEWS)
- Latest
