Mayor magpa-recall elections kun babagan ang 93-1 MOA

CEBU, Philippines - Natigayon na gyud kagahapon ang pinirmahay sa Memorandum of Agreement (MOA) nila ni Cebu City Mayor Tomas Osmeña ug Gobernador Hilario Davide III nga gipanglantawan nga maoy kasulbaran 23 ka tuig nang problema sa 93-1 lots.

Si Osmeña ug Davide nipirma sa MOA alang sa himuon nga land swapping deal aron nga maangkon sa mga nagpuyo sa 93-1 lots ang luna nga gitarokan sa ilang mga balay.

Gipahigayon sa maong pinirmahay sa atubangan sa Cebu City Hall nga gitambungan sa mayor, gobernador, City ug Provincial Administrators, pipila ka mga konsehal ug mga pangulo sa nagkadaiyang homeowners association sa 93-1 lots.

Matud ni Davide dihang konsehal pa lang siya sa siyudad usa ang 93-1 sa iyang gipaningkamutan nga mahatagan og solusyon ug karon nalipay siya nga natuman niya kini karon nga usa na siya ka gobernador.

Ang MOA kinahanglan pa og pagtugot gikan sa Provincial Board  ug sa City Council ayha pa mahitabo ang land swapping.

Apan si Osmeña mibahad nga kun dili aprubahan sa konseho o babagan ang MOA sa mga konsehal nga kaalyado sa Team Rama mo-file sila og petisyon alang sa election recall ilabi na sa north district.

Kini aron pagpatangtang sa mga konsehal sa Team Rama nga iyang gihulagway nga nakalangay sa damgo sa mga residente sa 93-1.

Ang presidente sa 93-1 Movement nga si Emily Malto nagpasalamat sa maong kalamboan tungod kay dugay na kaayo kini nilang gidamgo ug karon gusto nilang personalon paghangyo ang mga konsehal.

Adunay kapin singko mil ka pamilya nga nagpuyo sa nahisgutang mga luna ug dul-an dos mil niini ang nakakumpleto na sa pagbayad sa luna ug nakadawat na sa titulo atol sa administrasyon ni kanhi gobernador Gwendolyn Garcia.

Si Konsehal Joey Daluz III kinsa maoy Chairman sa Committee on Social Services and Housing ug sakop sa Team Rama nga nahinabi sa Banat News miingon dili gyud mahitabo nga ma-legally binding ang 93-1 MOA tungod kay wala man kini pagtugot sa konseho.

Nanghinaot lang siya nga unta sa wala pa mipirma og kasabutan ang mayor mikonsulta una kini sa konseho. Hinuon respetuhon ni Daluz kun unsay madesisyonan sa kadaghanan sa mga konsehal. Gihulagway lang ni Daluz ang bahad ni Osmeña nga wala kini salig sa “wisdom” sa konseho.

Matud niya ilang tun-an ang MOA ug dili kini sagolan og pamolitika tungod kay pag-abot sa isyu sa 93-1 Lots, way Team Rama ug BOPK kay alang kini sa kaayohan sa mga benepisyaryo. (BANAT NEWS)