May pushers sa eskuylahan

CEBU, Philippines - Wala na masurprisa pa si Cebu City Mayor Tomas Osmeña sa gibutyag sa Philippine Drug Enforcement Agency (PDEA)-7 nga dunay mga pampublikong tunghaan sa Dakbayan sa Sugbo nga adunay mga estudyanteng nagbaligya og ilegal nga drugas.

Una niini, si PDEA-7 Director Yogi Ruiz mibutyag nga aduna silay mga nadawat nga impormasyon nga adunay mga tinun-an nga namaligya og drugas diha mismo sa sud sa tunghaan.

Matud ni Ruiz, makaalarma kini tungod kay unta ang mga tunghaan drug free.

Si Osmeña miawhag sa PDEA sa paghimo dayon og imbestigasyon batok niining mga tinun-ang namaligya og drugas sud sa mga tunghaan ug nalipay siyang hasta ang mga tunghaan apil sa gitan-aw.

Sumala pa sa mayor, wala na siya makurat sa maong kasayuran kay matud niya naghitak gyud ang ilegal nga drugas sa bisan asa nga lugar.

Ang mayor daan nang nagplano nga papaliton ang siyudad og mga drug sniffing dogs nga ipakatap dili lang sa mga tunghaan apan lakip na sa mga barangay ug uban pa nga mga dapit.

Samtang si Police Regional Office-7 Director Chief Supt. Noli Taliño niangkon nga dugay na silang nasayod nga adunay mga estudyante nga nalambigit sa ilegal nga drugas.

Si Taliño miingon nga aduna na silay gihimong imbestigasyon kabahin niini apan wala siya mobutyag sa mga pangalan sa mga eskuylahan.

"Even before may mga reported information na na estudyante talagang may involved sa illegal drugs. Pero kasama yan sa ating validation na ginagawa,"matud pa ni Taliño.

Kini usab maoy rason nga ilang gitinguha nga matugotan ang kapolisan paglusad og information campaign batok sa illegal drugs diha sud sa mga tunghaan.

"For example iyung ating drug information drive. Yung objective noon ay to encourage the students na 'wag talaga gumamit ng druga," saysay pa niya.

Nagtuo si Taliño nga lagmit dunay mga estudiyante nga migamit og drugas gumikan lang sa ilang pagkakuryoso apan wala gayod sila nahibalo kung unsa ang mahimong epekto sa ilahang lawas.

Tungod sa maong report, ang pangulo sa Department of Education, Cebu City division mimando sa tanang mga principal sa pangpublikong eskuylahan nga pahugtan ang ilang seguridad.

Si DepEd-Cebu City Division schools superintendent Bianito Dagatan nakig-alayon na sa PDEA-7 kabahin niini apan dili pa makahatag ang maong ahensya sa listahan sa maong mga eskuylahan kay gipaubos pa kini sa pagpaniid.

Apan bisan pa niini, gusto ni Dagatan nga mohimo na og mga proactive measures ang tagsa-tagsa ka mga eskuylahan aron mapakgang kining mga ilegal nga kalihokan diha sud sa mga tunghaan.

Gimandoan ni Dagatan ang mga principal paghimo og mga lakang sama sa pagpahugot sa seguridad  diha sa entrada ug sa gawsanan sa eskuylahan ug pangusgan ang school-based programs alang sa mga tinun-an aron di sila mahaylo sa illegal drugs.

Kagahapon sa buntag, si Dagatan mipatawag sa mga magtutudlo nga mobarog isip mga security officers sa tagsatagsa nila ka mga eskuylahan diin sila magtudlo.

Sila gipangutana bahin sa tagsa-tagsa nila ka mga gipanghimong mga lakang ug kinahanglan nga ilaha kining higpit nga ipatuman.

Samtang kinahanglang estriktuhon usab ang pagsud-gawas sa mga outsiders sa mga eskuylahan ug magbantay kanunay sa mga kadudahang mga kalihokan diha sud sa eskuylahan. Report sa The Freeman (BANAT NEWS)