Dugang barangay officials ikiha sa PDEA–7
CEBU, Philippines - Laing mga opisyal sa barangay ang plano karon nga pasakaan og kaso sa director sa Philippine Drug Enforcement Agency-7 gumikan sa wala nila pagpakabana sa kampanya batok sa ilegal nga drugas sa ilang mga dapit.
Kini ang gitug-an ni PDEA-7 Dir. Yogi Filemon Ruiz sa dihang nahinabi sa mga tigbalita. Si Ruiz miingon nga sa pagkakaron nangita pa sila og lig-on nga mga ebidensya batok sa maong mga opisyal sa barangay aron lig-on nga kaso ang ilang mapasaka.
Wala pa mohatag og pangalan si Ruiz kung kinsa kini nga mga opisyales apan mailhan kini base sa imahe sa mga barangay kung ang maong dapit naghitak ang drugas.
Nagtuo si Ruiz nga nga kung naghitak ang drugas sa usa ka barangay duha ra ang hinungdan nagpasagad sa trabaho ang mga opisyal ug protektor sa drugas ang mga opisyal. “Let the evidence speak for itself…. Kanang mga problemaha wala man na nahitabo overnight. It took years, years nga pabaya,” matud pa ni Ruiz. Una nang gipasakaan og kaso ni Ruiz ang mga barangay officials sa barangay Ermita ngadto sa buhatan sa Ombudsman for the Visayas diin kasong paglapas sa Article 23 sa Revised Penal Code, nga naglambigit sa gross misconduct, gross neglect of duty, ug conduct prejudicial to the best interest of the service. (BANAT NEWS)
- Latest
