Lalaki nakuhaa’g P300 mil shabu
CEBU, Philippines - Gipaslak sa selda sa Punta Princesa Police Station ang usa ka 32 -anyos nga lalaki human nakuhaan og P300 mil nga kantidad sa shabu atol sa buy-bust operation diha sa F. Pacaña Street, Brgy. Tisa ning Dakbayan sa Sugbo.
Giila ang dinakpan nga si Jerome Dacaldacal, nagpuyo sa maong dapit.
Ang hepe sa Police Station 10, Sr. Insp. Alvin Llamedo maoy nangulo sa operasyon ug ilang gidakop si Dacaldacal human nakatunol og usa ka pakete nga gituohang shabu nga gipalit sa poseur buyer nga balor P1,000.
Gawas sa usa ka pakete nakuha sab sa mga polis ang 30 ka medium size sa shabu nga mitimbang og 30 gramos nga dunay kantidad nga P300 mil kapin nga kantidad.
Samtang nadakpan usab sa kapolisan sa Talisay ang duha ka gidudahang drug pushers sa Sitio Cassarre, Brgy. Cansojong, Dakbayan sa Talisay.
Ang mga dinakpan mao sila si James Ryan Oca alyas Bahaw, 25, ug si Cherill Capayas Gonzaga, 41.
Atol sa buy-bust operation nakuhaan si Bahaw og 23 ka gagmay nga paketeng shabu samtang tulo ka gagmay nga pakete gikan ni Capayas. (BANAT NEWS)
- Latest
