Cadastral kasulbad sa utlanan sa Tangke, San Roque

CEBU, Philippines - Matuman ang cadastral survey sa pagsuta sa utlanan nga maoy gikabangian sa Barangay Tangke ug San Roque sa Dakbayan sa Talisay.

Kini ang gipadayag ni City Legal Officer Giovanni Sususco nunot sa tinguha sa konseho sa siyudad nga sulbaron ang ilang bangi sa yuta sa duha ka barangay.

Hinoon si Sususco nitataw nga igo lang siya nipadayag sa iyang opinyon base usab sa iyang kasinatian sa pagpanglaban sa mga kaso sa yuta sa korte diin ang cadastral survey gyud ang gihatagan og gibug-aton.

Ang cadastral survey mao ang pagsusi sa luna nga gihimo sa gobiyerno ilabi na ang buhatan sa Department of Environment and Natural Resources (DENR).

Asoy pa niya nga sa dili pa sugdan ang survey nagkinahanglan gyud kini sa presensya sa mga tawo nga nangangkon sa luna. Ang Tangke pinaagi ni Kapitan Perla Cabanes ang nakapakita og dokumento nga gipaubos na sa cadastral survey ang lugar nga giilogan. Base sa iyang dokumento, ang Tangke adunay 43 ka ektarya samtang 197 ang sa San Roque.

Apan ang San Roque pinaagi ni Kapitan Elziever Abraham ang nibutyag nga daghan ang niduol sa ilang barangay ug nipakita nga San Roque ang ilang tax declaration. Si Abraham niingon nga 232 ka ektarya gyud ang San Roque.

Ang pagresolbar sa maong problema naa pa sa buhatan ni Konsehal Gail Restauro kinsa maoy chairman sa committee on laws. (BANAT NEWS)