Hospital 120316

CEBU, Philippines - Ang pag-develop sa mga hospital sa probinsiya maoy gisentro karon sa hepe sa Provincial Health Office (PHO) nga si Dr. Rene Catan ug matud niya nga ang budget nga kapin sa P400 milyones nga gigahin alang sa mga hospital sunod tuig dili kini kapaigo.

Matud ni Catan nga mga P450 milyones ang gigahin nga budget sunod tuig alang sa PHO nga magamit sa operasyon sa mga hospital ug laing P135 milyones alang sa ilang Annual Investment (AIP) o alang sa mga inprastraktura ug ekipo sa mga tambalanan.

Sa sunod tuig nikabat ngadto sa P3.6 bilyones ang gisugyot nga budget sa probinsiya ug 20 porsiyento niini ang gigahin sa PHO. Apan giingong ang maong budget kuwangan kaayo matud ni Catan.

Sigon niya nga nagkinahanglan og P2.5 bilyones aron mapauswag ang mga tambalanan sa probinsiya. Hinungdan nga karon giuna nila sa pagpauswag ang mga provincial hospital nga gilangkuban sa dakbayan sa Carcar, Danao, Bogo ug sa lungsod sa Balamban.

Gibutyag ni Catan nga niadtong tuig 2014, 2015 ug niining tuiga adunay mga P30 milyones alang sa AIP ang wala magamit. Ang maong budget gigamit karon sa pagpamalit og mga ekipo sa tambalanan.

Ang budget sa AIP alang sa sunod tuig gamiton usab sa pagpamalit og mga ekipo ug pagpaayo sa tambalanan.

Ang PHO nang-hire na karon og mga personnel alang sa mga tambalanan ug nagsugod na usab sila og proseso sa mga rekisitos alang sa International Organization for Standardization (ISO). Si Catan naglaom nga ISO certified na sila sa tuig 2018. (BANAT NEWS)