Gabion Dams sa kabukiran palimpyohan

CEBU, Philippines - Daghang “gabion dams” nga gitukod diha sa mga upland barangays sa Dakbayan sa Sugbo atol pa sa unang termino ni Mayor Tomas Osmeña aron unta mapugngan ang baha, wala na kaayo mapahimusli.

Gibutyag ni Osmeña nga sagad niining maong mga dams napuno na sa lapok ug dili na makasangga og tubig aron unta dili direkta nga modagayday sa kinaubsan ug makamugna og paglunop kun adunay kusog nga uwan.

Matud ni Osmeña nga iyang ipasusi kining maong mga gabion dams ug pahimoan og Program  of Works and Estimates (POWE) aron kasugdan ang trabaho sa paghabwa sa mga lapok nga nakapuno sa dam.

Kining maong mga dam kaniadto malampuson nga mipugong sa tubig gikan sa kinaibabwan nga dili dayon paspas nga modagayday paingon sa mga lupa nga bahin sa dakbayan.

Apan dihang napuno na kini sa lapok, ang tubig molahos na lang ug modiretso pagdagayday sa ubos hinungdan nga dunay mga dapit sa siyudad nga maglunop.

Gipasabot sa mayor nga ang gabion dams gihimo pinaagi sa gihulma nga semento nga nagsiwagkang ug tulo ka bahin. Gituyo kini nga porma aron nga maggunitay ang masi’g ka semento ug makahatag og kalig-on.

Susama kini nga matang sa semento ang gihapnig sa daplin nga bahin sa South Road Properties atol sa paghimo pa kaniadto sa reclamation project diin si Osmeña maoy nagdumala.

Malaumon si Osmeña nga kun mahabwaan na ang mga gabion dams diha sa mga upland barangays makatabang kini nga momenos na ang paglunop-baha dinhi sa dakbayan. (BANAT NEWS)