Pusher nisuway’g dunggab sa polis napusilan

CEBU, Philippines - Naangol ang usa ka gidudahang pusher og shabu nga misulay unta sa pagdunggab sa polis nga poseur buyer atol sa buy-bust operation sa Sitio Sun-ok, Brgy Ibabao, Lungsod sa Cordova.

Si Police Officer 3 Reynante Marababol sa Cordova Police Station miila sa suspetsado nga napusilan nga mao si Ricky Tejano, 38, nagpuyo sa maong dapit.

Matud pa ni Marababol nakadawat og taho labot sa nagpadayon nga ilegal nga kalihokan sa maong suspetsado sa maong dapit hinungdan sa gilusad nga operasyon.

Sumala pa nga si PO1 Ritchie Abao milampos na unta sa pagpalit og  usa ka paketeng shabu bugti usab sa P300 nga marked money gikan sa suspek apan nakamatikod ang naulahi ug diretsong midunggab ang maong polis.

Ang back up ni Abao nga nagtion na daan sa gidala niining Armalite daling nakapusil sa tiil ni Tejano hinungdan sa pagtahan niini ug gidala sa tambalanan.

Dugang pang 11 ka paketeng shabu ang nakuha gikan sa suspetsado  lakip ang kutsilyo nga 12 pulgadas ug ang P300 nga marked money.

Samtang usa ka Emma Linda Dalapo,40, ang nadakpan sa kapolisan tungod sa pagpamaligya og shabu diha sa Sitio Mananga 2, Dakbayan sa Talisay.

Si SPO3 Rolando Andales sa Talisay City Police Station nagkanayon nga napalitan nila ang suspek og usa ka paketeng shabu ug sa ilang pagrekisa nasuta nga diha niya gitago ang shabu sa bra niini.

Ang mga silingang babaye sa suspek na maoy gihangyo sa kapolisan nga walison ang bra sa dinakpan ug didto nasakpan ang dugang 27 ka gagmay nga paketeng shabu. (BANAT NEWS)