Comelec: Gamay gihapon ang nagparehistro

CEBU, Philippines - Nadismaya kaayo si Cebu City north district election officer Marchel Sarno kay gamay pa kaayo ang mipahimulos sa “early registration” alang sa gikatakdang eleksiyon sa barangay karong Oktubre 23 sa sunod tuig.

Matud ni Sarno nga maayo gyud unta nga mosayo pagparehistro kadtong nagtinguha pagbotar sa barangay election ug dili kay adto na sila mag-ambahan sa opisina sa Comelec kun duol na ang piniliay.

Si Sarno miingon nga maihap pa lang sa tudlo ang mga tawo nga moadto sa opisina sa Comelec niining panahona aron sa pagparehistro, ingon man kadtong gustong mobalhin sa pagbotar.

Gitataw ni Sarno nga kadtong mga batan-on nga motangkod na nga 15-anyos atol sa adlaw sa eleksiyon unya sa Oktubre 23, sunod tuig, makahimo sa pagparehistro aron makabotar sila sa Sanguniang Kabataan. 

Nagplano si Sarno nga mohimo sila pagpangrehistro pinaagi sa pag-adto sa lain-laing barangay mintras nga layo pa ang barangay election.

Si Sarno miingon nga nagtuo g’yud siya nga daghan pa g’yud kaayo ang wala makaparehistro tungod kay sa wala pa tak-upi ang pagpangrehistro pipila ka buwan ang milabay, kaliboan ka tawo ang nag-ambahan sa opisina sa Comelec.

Matud ni Sarno nga atol sa maong higayon makarehistro sila og kapin sa 800 ka tawo kada adlaw hangtod nga gatosan pa nga gustong magparehistro ang naabtan gyud sa deadline. Sa laing bahin,  si Comelec Provincial Supervisor, Atty. Lionel Marco Castillano nanghinaot nga dili lang unta sila balhinon ngadto sa Larsian kung maugmad na ang BAEX Building diha sa Kapitolyo. Ang buhatan sa Comelec karon nahimutang diha sa BAEX building sulod sa compound sa Kapitolyo nga karaan na kaayo ug aduna nay parte niini ang wala na maukopahi tungod kay naguba sa linog.

Si Castillano mibutyag nga niining ulahi lang gipahibawo sila sa Provincial General Services Office (PGSO) nga ibalhin sila sa bakanteng buhatan ngadto sa Larsian.

Matud ni Castillano nga giingong ang maong ilang balhinan bahaan ang maong lugar ug gawas pa niini layo na sila sa Provincial Treasury Office.

Dugang ni Castillano nga ang mga supply alang sa eleksiyon iagi gyud kini diha sa PTO.

Apan si Gob. Hilario Davide, III nagkanayon nga posibleng temporaryo lang ang pagpabalhin sa Comelec ngadto sa Larsian.

Matud ni Davide nga kung mahuman na ang pagpatukod og bag-ong building sa BAEX duna gihapoy pwesto ang Comelec diha sa maong lugar. (BANAT NEWS)