Barangay chairwoman, itinumba

MANILA, Philippines – Patay ang 65-anyos na barangay chairwoman matapos itong pagbabarilin ng  dalawang nagpanggap na supporter ng biktima sa kaniyang tanggapan sa Barangay Hall ng Sta. Clara sa bayan ng Sto. Tomas, Batangas  noong Martes ng umaga. Kinilala ang biktima na si Chairwoman Leonor Angeles, matandang dalaga, ng Brgy. Sta Clara sa nasabing bayan. Napuruhan sa ibabang bahagi ng kaliwang mata na naglagos sa ulo ng biktima at idineklarang patay sa Saint Francis Cabrini Hospital. Sa police report na nakarating sa Camp Crame, abala sa pag-aayos ng mga documento sa kanyang opisina si Angeles nang dumating ang dalawang lalaki na nagpanggap na supporter ng biktima. Gayunman, pagkapasok sa loob ay bigla na lamang pinagbabaril ang biktima. Nagmamadaling tumakas ang dalawa lulan ng motorsiklo.