6 ka LGUs wa’y LDRRMO

CEBU, Philippines - Unom ka lungsod sa probinsiya sa Sugbo ang hangtud karon wala pay Local Disaster Risk Reduction Management Office (LDRRMO) matud sa tigpamaba sa Provincial Disaster Risk Reduction Management Office (PDRRMO) nga si Julius Regner.

Ang maong mga lungsod gilangkuban sa Badian, Pilar, Minglanilla, Borbon, Madridejos ug Samboan. Gibutyag ni Regner nga adunay bulok politika ang usa sa mga hinungdan nga wala pay mga LDRRMO.

Ang ubang kalungsuran wala pa’y mga responder samtang ang uban adunay mga responder apan walay LDRRMO in-charge.

Giingong ang ubang mga lungsod duna na untay mga LDRRMO kaniadto ug mga responder apan ang mga personnel gipangtaktak sa bag-ong administrasyon kay dili nila kini kaalyado.

Matud ni Regner nga importante kaayo sa usa ka lungsod o siyudad nga adunay LDRRMO kay mao kini ang mag-monitor kun ugaling adunay mga katalagman nga moabot. Sila sab ang mohatag og impormasyon kabahin sa pag-igo sa katalagman aron maabisohan ang lokal nga kagamhanan ug mga residente alang sa ilang pagpangandam aron malikayan ang disgrasya.

Ang LDRRMO mao usab ang motudlo sa mga residente sa ilang buhaton kun ugaling adunay mga moigo nga katalagman.

Gibutyag ni Regner nga naghinay-hinay sila karon og hangyo sa mga mayor sa nahisgutang mga lungsod nga walay LDRRMO nga unta mo-kooperar sa probinsiya.

Dugang ni Regner nga ang pagbaton og LDRRMO nakalatid sa balaod mao nga sila nagplano nga mohangyo sa hunta probinsiya nga magpalabang og ordinansa nga kun bisan kinsa pa ang mga mopuli nga mayor sa mga LGU ipabilin gyud ang LDRRMO ug ang mga responders.

Subay niini, ang PDRRMO nagpahigayon og La Niña caravan diin gipangbisita nila ang mga eskwelahan ug komunidad ilabi na kadtong mga delikado sa baha ug pagdahili sa yuta.

Gipahibawo ni Regner nga nanghatag sila og mga tips ngadto sa kabataan, magtutudlo ug mga ginikanan kabahin sa ilang mga buhaton sa pagpangandam kun adunay mga katalagman nga moabot. (BANAT NEWS)