Drug related ang kamatayon sa negosyante’g isda?

CEBU, Philippines - Kasamtangang nag-imbestigar ang kapolisan sa dakbayan sa Lapu-Lapu subay sa pagpatay sa 52 anyos nga negosyante og isda niadtong Lunes sa gabii sa Brgy.  Pusok.

Nagkanayon si PCIns. Junnel Caadlawon, chief of operation sa Lapu-Lapu City Police Office nga ila pang gisusi kun unsa ang hinungdan sa maong insidente ug kun drug-related ba kini kay maayong pagkaplano ang krimen.

Kahinumduman nga gipusil patay sa makadaghang higayon ang biktima nga si Sylvestre Lahura sa tulo ka wala mailhing mamumuno.

Atol sa hitabo gikawat sab ang bag nga adunay sulod nga kwarta, cheke ug alahas ni Leonora Igor ug ang anak niini nga uban ni Lahura nga nagkantidad tanan og P120 mil.

Sa dakbayan sa Toledo, mokabat sa P138 mil ang kantidad sa gituohang shabu sa gipahigayong pagpangronda sulod sa panimalay sa giingong drug pusher sa Sitio Baybay Uno, Brgy. Poblacion kagahapon sa hapon.

Ang dinakpan mao si Emmanuel Batomalaque nga anaa sa watchlist sa kapolisan.

Pinaagi sa search warrant nga giisyu ni RTC Branch 29 Judge Ruben Altubar natigayon ang pagpangronda sa balay sa suspek pinanguluhan ni Toledo City Police chief PSupt. Samuel Mina Jr.

Nakuhaan si Batomalaque og 64 ka gagmay nga putos sa shabu nga nagkantidad og P2 mil.

Nasayran nga nasikop na kini kaniadto sa susamang kaso apan nakapiyansa.

Samtang sa lungsod sa Liloan, nasikop ang giingong pusher og marijuana sa Sitio Fatima, Brgy. Jubay alas 10 pasado sa niaging gabii.

Si SPO1 Almer Maglinte sa Liloan Police Station niila sa dinakpan nga si Sunday Udtohan. Nitahan na kini sa Oplan Tokhang ug nanumpa nga mohunong na sa ilegal nga kalihokan.

Apan matud ni SPO1 Maglinte ilang nasuta nga nibalik kini sa pagpamaligya og marijuana hinungdan nga ila kining gi-buy-bust ug nagpositibo. (BANAT NEWS)