Unom na patay sa dengue sa Talisay
CEBU, Philippines - Unom na ang namatay sa dengue ang natala sa City Health Office sa Talisay sugod niadtong Enero.
Si City Health Officer, Dr. Lino Alanzado, niingon nga sa kinatibuk-an aduna na silay natala nga 340 nga nataptan sa maong sakit.
Bag-o lang napun-an og usa ang namatay sa maong sakit.
Ang labing bata nga namatay nagpangedaron og 3-anyos samtang 17-anyos ang labing taas.
Siya nagkanayon nga posible sab nga madugangan pa ang ilang lista sa mga tawo nga nataptan sa maong sakit apan sa pagkakaron dali nilang gipalit ang misting machine aron magamit sa pagbugaw o pagpatay sa mga lamok nga nagdala og dengue.
Si Mayor Eduardo Gullas nipadayag nga mopagawas na siya og executive order aron pormal na gyud nga mahulma ang anti-dengue task force.
Matud ni Gullas nga kinahanglan nga i-prayoridad gyud ang pagsumpo sa dengue tungod kay dili lalim kun adunay sakop sa pamilya nga mataptan sa maong sakit.
Siya nagkanayon nga siya mismo nakasinati sa maong suliran kaniadto sa dihang nataptan sa sakit ang iyang bugtong anak.
Iyang giawhag ang tanan nga manglimpyo nga maoy numero uno nga taming batok sa makamatay nga sakit nga dengue ug dili lang isalig ang tanan sa mga awtoridad o diha kanila.
Sila si Alanzado ug ang iyang mga sakop ang nakig-alayon na sa kabarangayan aron mapaspasan na ang ilang mga lakang. (BANAT NEWS)
- Latest