Dili break up, cool off lang

Sa iyang pag-atubang sa mga negosyante ug opisyal sa mga pikot og mata sa China, gipahibawo ni Presidente Rodrigo Duterte nga putlon na sa Pilipinas ang iyang relasyon sa Amerika nga milungtad na og 70 ka tuig, dili lang sa natad sa military, kun dili, apil na sa natad sa ekonomiya.

Apan ang mga sakop sa gabinete nga nagsilbe nga tigtambag sa presidente tungod sa ilang pagkaeksperto sa opisina nga sila anaa gibutang, nagkalainlain sa ilang mga pagpasabot mahitungod sa gipamahayag ni Duterte.

Matud nila nga ang gipasabot sa presidente dili separation sa Amerika, kun dili, re-balancing lang. Dili devorce, kun dili, separation lang kini kun ikumparar sa relasyon sa managtiayon. Dili break-up, kun dili, cool off lang kun ikumparar sa relasyon sa managhinigugmaay.

Tungod sa nagsumpaki nga pamahayag sa presidente ug mga pagpasabot sa mga sakop sa iyang gabinete, ang Amerika wala makasabot maong ilang gipangayo sa Pilipinas ang katin-awan sa buot ipasabot sa pamahayag ni Duterte, ug sa mga pagpasabot sa mga sakop sa iyang gabinete. Ang nagkasumpaki nga pamahayag sa presidente ug sa mga sakop sa iyang gabinete makadaghan na mahitabo. Usa niini ang deklarasyon sa presidente nga iya nang gipahunong ang joint military exercise sa Pilipinas ug Amerika.

Gitug-an ni Defense Secretary Delfin Lorenzana atubangan sa mga senador nga wala siya konsultaha sa Presidente mahitungod niini. Kini resulta sa hasmag-hasmag nga pamahayag ug walay pagpangunsulta  ni Duterte sa mga sakop sa iyang gabinete nga mga eksperto.  Pagkaluoy sa mga sakop sa gabinete ni Duterte kay matagbaw intawon sa pagpangita og rason aron makalusot ang presidente sa mga sayop nga pamahayag.

Ang akong gikabalak-an kun ang mga sakop sa gabinete sa presidente maglumba sa pagpangluwat sa ilang katungdanan kay gikapoyan na sa pagpasabot ngadto sa mga tawo sa makalibog ug sayop nga pamahayag.

Sugyot nako ni Duterte, pangonsulta gyud usa Mr. President.