Pagpupulungan ng PBA Governors Gilas Drafting paano gagawin?

MANILA, Philippines - Nakatakdang magpulong ang PBA Board of Go-vernors sa Huwebes para resolbahin ang isyu sa draft order para sa mga players ng Gilas Pilipinas na sasalang sa 2016 Rookie Draft sa Oktubre 30 sa Robinson’s Place sa Ermita, Manila.

Hindi pa malinaw kung anong draft order ang gagamitin para sa 12 players ng Gilas Pilipinas na sasailalim sa isang special draft kasunod ang regular draft ng liga.

Sa regular draft order, ang Blackwater ang kukuha sa No. 1 overall pick  at maaari nilang piliin si 6-foot-4 power forward Mac Belo, gumiya sa Far Eastern University Tamaraws sa korona ng nakaraang UAAP season.

Ang iba pang miyembro ng Gilas Pilipinas, hahawakang muli ni coach Chot Reyes ay sina Carl Bryan Cruz, Ed Daquioag, Russel Escoto, Kevin Ferrer, Jio Jalalon, Von Pessumal, Roger Pogoy, Mike Tolomia, Arnold Van Opstal, Matthew Wright at Alfonso Gotladera.

Ang 12 PBA teams ay huhugot lamang ng isang Gilas player kung saan hindi nila ito maaaring i-trade sa susunod na dalawang taon.

Matapos ang Blackwater ay ang Phoenix Petroleum ang tatawag sa No. 2 overall pick kasunod ang Barangay Ginebra, Mahindra, Star, San Miguel Beer, Meralco, NLEX, Rain or Shine, Ginebra, Alaska at Phoenix sa first round.

Unang pipili sa second round ang NLEX kasunod ang Rain or Shine, Globalport, Meralco, Alaska, Rain or Shine, Globalport, Phoenix, Rain or Shine, Mahindra, Alaska at Phoenix.

Samantala, kinumpleto nina collegiate stars Gelo Alolino, Paolo Javelona, Mcjour Luib, Mikee Reyes at FIBA Asia Challenge campaigners Chris Javier at Jonathan Grey ang final list ng mga aplikante para sa PBA Rookie Draft.

Ang iba pang nasa listahan ay sina NCAA standouts Palo Pontejos, Jovit dela Cruz, Jamil Ortuoste, John Tayongtong, Jordan dela Paz, Al Francis Tamsi, Achie Inigo, Jeoffrey Javillonar, Levi Hernandez, Joseph Eriobu at Jammer Jamito.

Ang lahat ng aplikante ay sasailalim sa Draft Combine sa Miyerkules at Huwebes sa Gatorade Hoops Center kasunod ang paghahayag ni PBA Commissioner Chito Narvasa ng final draftees. (RCadayona)