Mayor sa Alcoy gisuspenso sa Ombudsman

CEBU, Philippines - Gisilotan og usa ka buwan nga suspensyon ang kasamtangang mayor sa lungsod sa Alcoy nga si Mayor Michael Angelo Sestoso human kini napakyas sa pag-liquidate sa iyang nagasto didto sa Boracay, lima ka tuig na ang nakalabay.

Sa pito ka pahina nga desisyon nga pinirmahan ni Deputy Ombudsman for the Visayas Paul Elmer Clemente, si Sestoso napamatud-an nga guilty sa kasong Simple Neglect of Duty dihang pakyas siya sa pag-liquidate sa iyang cash advance (CA) alang sa iyang travel expenses nga muabot og kapin P21 mil atol sa iyang pagtambong og meeting niadtong Hunyo 24-26 sa tuig 2010 didto sa Boracay.

Matud ni Atty. Maria Corazon Naraja ang tigpamaba sa Visayas Ombudsman nga ang field investigation office sa ilang buhatan maoy nipasaka sa reklamo batok ni Sestoso sa dihang nipahigayon sila og fact finding investigation base na usab sa report nga nadawat sa ilang buhatan.

Si Naraja nitumbok sa COA Circular No. 97-002 kun diin ang mga opisyal sa gobiyerno nga adunay CA alang sa travel expenses, kinahanglan nga mosumiter sa ilang liquidation sulod sa 30 ka adlaw gikan sa iyang pagbalik. Apan matud sa report sa Municipal Accountant sa Alcoy, niadtong Agosto 31, 2015 lang naka-liquidate si Sestoso o 5 ka tuig gikan sa iyang pagbiyahe.

Sa counter affidavit ni Sestoso, giangkon niini nga iyang nadawat ug nagamit ang kwarta apan iyang gihimakak nga pakyas siya sa pag-liquidate niini.

Ang desisyon sa Ombudsman niadtong Septiyembre 13 niining tuiga, nakakita og “probable cause” aron mapasakaan og kaso ang mayor tungod sa “Failure of Accountable Officer to Render Accounts”.

Nimando usab ang Ombudsman ngadto sa Department of Interior and Local Government nga iimplementar ang maong desisyon.

Si Sestoso sa iyang bahin niingon nga wala pa niya madawat ang kopya sa desisyon ug tun-an nila sa iyang abogado kun unsay sunod nila nga aksyon kun madawat na nila ang kopya. (BANAT NEWS)