Badian, Alegria nagkasinabot na sa canyoneering
CEBU, Philippines - Nagkasabot ang mga lokal nga kagamhanan sa Lungsod sa Alegria ug Badian nga dili na ipaubos sa co-management ang canyoneering activity sa Kanlaob River.
Nasabutan niadtong Biyernes sa Kapitolyo nga ang duha ka lungsod parehong mopasulod og mga guests sa ilang tagsa-tagsa ka lugar alang sa canyoneering.
Matud ni Joselito “Boboi” Costas, pangulo sa Provincial Tourism Office, nga ang duha ka lungsod uyon usab sa hangyo sa Kapitolyo nga maoy mosuperbisar sa kalihukan.
Apil sa tan-awon sa Kapitolyo ang procedure management, resource conservation management, polisiya ug ingon man ang health and safety sa mga turista o bisita.
“Non-negotiable meaning to say kami gyud ang motan-aw, the provincial government, dili madala nga sila sila ra, seguro okay ra na later kun unsay gusto nila nga mga i-package sa ilang tours. Okay ra namo although motan-aw gihapon mi ana, ang mga non-negotiable maoy tan-awon gyud namo,” matud ni Costas.
Pareho usab nga package rate nga ipatuman sa duha ka lungsod sa tag P1,500 matag usa ka guest.
Ang mosulod sa Badian sa Barangay Sulsogan magsugod gikan sa “jump 4 area” ug mogawas sa Kawasan Falls sa Barangay Matutinao sa Badian.
Samtang ang mosulod sa Alegria adto sa Barangay Compostela mosulod gikan sa jump 1 ngadto sa jump 7 apan dili na makasulod pa sa Kawasan Falls.
Kung ang bisita mopili nga mopadayon hangtud sa Kawasan adunay dugang bayad niini. Apan kung pila ang additional nga bayad, si Costas wala na masayud niini.
Gusto usab sa parehong lungsod nga ipresentar sa Department of Environment and Natural Resources ang location survey result nga gihimo sa Kanlaob River sa pagsuta sa utlanan sa duha ka lungsod ngadto sa Provincial Board. (BANAT NEWS)
- Latest