Anti-discrimination ordinance sa Talisay may bikil
CEBU, Philippines - Wala una aprobahi sa konseho sa Dakbayan sa Talisay ang anti-discrimination ordinance human wala nalakip sa ordinansahon ang mga ex-convict.
Ang ordinansa gipangamahanan ni Bise Mayor Alan Bucao apan gikwestiyon ni Konsehal Socrates Fernandez kinsa nisugyot nga mas maayo nga iapil ang mga nakagawas na sa bilanggoan.
Ang ordinansahon nagmando sa wala nay pagpihig base sa “social status, sexual orientation, gender identity, ethnic origin, religious affiliation, physical handicap, age and gender.”
Si Fernandez nisaysay nga mas maayo nga makabalik sa komunidad ang mga kanhi binilanggo ilabi na sa ilang pag-apply og trabaho.
Apan si Bucao nibutyag nga maayo ang sugyot ni Fernandez pero kinahanglan gyud kini og pagtuon tungod kay ang iyang ordinansahon nagbase ra man sa nasudnong balaud.
Giklaro ni Bucao nga lisud himoon ang ordinansa nga pugson ang mga kompaniya nga pasudlon sa trabaho ang mga ex-convict tungod kay aduna man sab silay ilang lagda sa pagkuha og mga trabahante.
Sigun pa niya nga ang maong ordinansahon mas maayo nga tun-an ug ilakip si Fernandez aron ilang mahan-ay og unsa gyud ang sakto nilang buhaton. (BANAT NEWS)
- Latest
