Anak sa ‘Surrenderers’ may scholarship

CEBU, Philippines - Adunay kahigayonan ang mga anak sa “drug surrenderers” nga makapadayon sa pag-eskwela ubos sa Paglaum Scholarship Program sa Kapitolyo.

Tumong lang unta sa maong programa ang mga kabus nga estudyante sa probinsiya kinsa buot makatapos sa ilang pag-eskwela sa kolehiyo.

Apan si Bise Gobernador Agnes Magpale kinsa maoy principal author sa ordinansa sa Paglaum niusab sa maong balaud diin buot niyang maapil sa beneficiaries ang mga anak sa mga “drug surrenderers.”

Gipasabot ni Magpale nga wala sila modapig sa ilegal nga binuhatan apan ang ilang mga anak biktima lang sa sitwasyon ug kinahanglan nga matabangan ug mahatagan og paglaum ang ilang kinabuhi.

Niining hugtanon nga kampaniya sa administrasyon ni Presidente Rodrigo Duterte batok sa ginadiling drugas, ubay-ubay na ang mga nisurender nga pusher ug user sa ginadiling drugas.

Matud ni Magpale nga andam silang motabang sa mga nisurender kinsa buot nga magpa-rehab ug mopadayon sa pag-eskwela sa kolehiyo.

Niadtong Septiyembre 14, ang kagamhanan sa probinsiya nigama og memorandum of agreement (MOA) tali sa mga pangpublikong kolehiyo ug unibersidad ug technical-vocational schools alang sa pagpatuman sa maong programa.

Ang probinsiya maoy direktang mobayad ngadto sa mga eskwelahan sa tuition fees sa mga scholars.

Ang scholars kinahanglan moduso sa kopya sa ilang tuition fee bills sa Provincial Treasurer’s Office nga maoy moatiman sa mga bayranan ngadto sa eskwelahan diin sila ma-enrol.

Ang mga eskwelahan naglakip sa Cebu Technological University ug mga satellite campuses, University of the Visayas, University of Cebu, Northeastern Cebu Colleges, Mandaue City College ug Lapu-Lapu City College ug ubang community      colleges sa  kalungsuran.

Ang mga tunghaan nga nagtanyag og vocational-technical courses sama sa Banilad Study Center ug Technical Educational and Skills Development Authority (TESDA) nisuporta sab sa programa.

Sa P1 milyon nga pundo nga gigahin sa programa moabot ngadto sa 10 ka scholars matag distrito ang ma-cover niini.

Ang matag scholar adunay P10,000 alang sa tuition ug P1,500 nga subsistence allowance.

Sa sunod semester niining tuiga, ang Paglaum magsugod na og patungha og mga scholars sa kolehiyo.

Sayo niini si Gobernador Hilario Davide III nisaad nga sa tuig 2017 patas-an niya ang budget sa scholarship program.

Lakip sa makabenepisyo sa programa ang mga persons with disabilities, biktima sa pagpanglugos, human trafficking, drug abuse ug child abuse, anak sa solo parents, wala nay mga ginikanan, underprivileged, marginalized ug gikan sa broken family. (BANAT NEWS)