P1K ra ang ihatag sa Seniors karon
CEBU, Philippines - Ang mga senior citizens dinhi sa Dakbayan sa Sugbo nga dili dayon makakubra sa ilang tagsa ka libo ka pesos nga cash assistance karong adlawa gihatagan lang og duha ka adlaw nga lugway sa pagkolekta niini.
Sa iyang kamandoan, si Mayor Tomas Osmeña miingon nga kadtong dili makakubra sa ilang cash assistance karong adlawa diha sa mga barangay, gihatagan lang og higayon pagkubra didto sa City Treasurer’s Office ugmang adlawa ug sa Martes.
Matud ni Osmeña nga kadtong mapakyas lang gihapon pagkubra sa ilang tag-usa ka libo ka pesos didto sa City Treasurer’s Office, kinahanglan na sila nga mosuwat kaniya ug ipasabot ngano nga wala dayon sila makakubra atol sa pagpanghatag sa incentives.
Kinahanglan usab nga ang pagpangayo nila og rekonsiderasyon gikan sa mayor dili molapas sa Oktubre 14 kay kadtong dili makuha lapas niining maong tagal ibalik na sa panudlanan sa dakbayan.
Gitumong kining maong lakang aron pag-counter sa kalihukan sa pipila ka senior citizens nga nangayo gihapon og cash assistance ug nagpatuo nga sila dia nag-estar sa dakbayan bisan og atua na sila magpuyo sa lagyong probinsya.
Gituohan nga tungod kay P1,000 ra man ang ipanghatag nga cash assistance sa matag senior citizens karong adlawa, adunay daghan nga dili makakubra kay ang mga tua na nagpuyo sa lagyo nga lugar maalkanse man sa ilang pamasahe pagpauli dinhi sa dakbayan. Adunay kapin sa 67,300 ka senior citizens dinhi sa dakbayan nga gilista nga makadawat og cash assistance karong adlawa diha sa 80 ka barangay ning dakbayan.
Matag senior citizens gigahinan og tag P12 mil nga cash assistance para karong tuiga, ug ang nahibiling P3 mil ihatag kanila hangtod sa kataposang adlaw karong tuiga. (BANAT NEWS)
- Latest