Koneksyon sa drug lords gisusi

CEBU, Philippines - Gipalawman karon sa Homicide Section sa Cebu City Police Office ang imbestigasyon kabahin sa kamatayon sa usa ka babaye nga gipatay diha sa dalan Carlock, Brgy. Duljo-Fatima nga giingong pag-umangkon ni anhing Crisostomo “Tata Negro” Llaguno niadtong Biyernes sa hapon.

Matud pa ni Sr. Supt. Noli Taliño, director sa Police Regional Office -7 base sa pasiunang kasayuran nga nahipos sa mga imbestigador ang biktima nga si Analou Llaguno kapuyo ni Rolando “Kerwin” Espinosa kaniadto.

Si Espinosa mao ang anak ni Albuera, Leyte mayor Rolando Espinosa nga parehong gipangalanan ni Pres. Duterte nga nalambigit sa negosyo sa ilegal nga drugas dinhi sa kabisay-an.  Si mayor Espinosa mihimakak niini samtang ang iyang anak nga si Kerwin padayon pang gipangita sa kapolisan.

Sumala pa ni Taliño, na-“link” usab si Llaguno kang Jeffrey "Jaguar" Diaz, ang giila sa kapulisan nga "top drug lord" sa Dakbayan sa Sugbo kinsa napatay sa kapolisan didto sa Las Piñas City niadtong naghinapos nga bahin sa bulan sa Mayo.

Si Taliño mimando nga beripikahon ang maong impormasyon ug palawman pa ang pagsubay sa motibo sa kamatayon ni Analou.

Nagsakay og motor si Llaguno alas 2:45 sa hapon niadtong Biyernes kauban ang matud pa iyang uyab nga si John Joseph Romare, 21, dihang kalit silang giabayan og laing motorsiklo nga ang angkas diretsong mipusil sa babaye.

“Naka received mi og report nga ang victim (Analou) kay live-in partner ni Kerwin(Espinosa) sa una unya na-linked sad daw ni Jaguar. Pero kini subject for validation pa,” sumala pa ni PO3 Edario Manatad.

Si Manatad nagkanayon nga wala pay niduol sa ilang buhatan aron mohatag og impormasyon kun kinsa ang mga mamumuno sa biktima.

Giklaro ni Manatad nga bisan pa sa maong mga dugang impormasyon nga ilang nakuha, dili sila makaingon nga may kalambigitan sa ilegal nga drugas ang kamatayon niini.

Matud pa nga si Analou adunay mga negosyo sama sa pautang og kwarta, namaligya usab kini og mga alahas ug adunay balay nga paabangan (apartment) ug usa kini sa gitan-aw nilang posible usab nga hinungdan sa motibo. (BANAT NEWS)