Cardinal, Ambassador gipasidunggan
CEBU, Philippines - Gihatag sa Catholic Educations Association of the Philippines (CEAP) ang labing taas nga pasidungog ngadto nilang Gaudencio Cardinal Rosales ug Ambassador Henreitta De Villa.
Matud ni Sr. Marissa R. Viri, RVM, chairman on membership and award committee, nga dili sila kanunay mohatag sa Pro Deo et Patria.
Apan atol sa ika-75 ka tuig sa CEAP national convention nga gipahigayon sa Dakbayan sa Sugbo, giila ang dakung nahimo sa duha dili lang sa ilang pagka-Katoliko Romano apan labaw na ngadto sa katawhan.
Si Rosales responsable sa proyekto nga Pundong Pinoy nga nagtabang sa mga kabus ug ang pagpabarug sa kapuy-an sa kaparian nga nagmasakiton ug naa na sa katiguwangon.
Si De Villa daku usab og nahimo sa kalihukan sa Parish Pastoral Council for Responsible Voting (PPCRV) tumong sa kahapsay ug kalimpyo panahon sa eleksiyon.
Ang duha nakadawat og icon sa Christ the Preacher.
Si De Villa mapasalamaton sa pasidungog ug iya kining ihalad sa iyang mga ginikanan, pamilya ug mga volunteers sa PPCRV.
Giawhag ni De Villa ang CEAP nga tabangan ang PPCRV nga ilakip sa ilang curriculum ang voters education aron makadugang kini sa kaalam sa kabataan ilabi na may kalabutan sa electoral process sa Pilipinas. (BANAT NEWS)
- Latest
